Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 68 Hüküm no: 21 Orijinal metin no: [11b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Reis’in Baba Mehmed Çelebi b. Mahmud’a açtığı alacak davasından vazgeçmesi Dîvân-ı Hümâyûn kâtiblerinden işbu râfi‘ü’l-kitâb Baba Mehmed Çelebi b. Mahmud meclis-i şer‘-i şerîfe hâzır olup kasaba-i Kasımpaşa’da Surûrî Efendi mahallesinde sâkin Hâssa re’îslerden Hasan Reis b. Mehmed nâm kimesne mahzarında takrîr-i kelâm edip bundan akdem mezbûr Hasan Reis sene ihdâ ve elf Cumâdelâhire’sinde vilâyet-i Eflak voyvodası Aleksandra nâm zimmîye elli beş bin mev‘ûd akçeye beş yüz vakıyye yel mumu ve mâ-beynlerinde ma‘lûm bir re’s at ve bir gümüş raht ve bir câriye bey‘ edip zikr olunan emti‘ayı mezbûr zimmîye teslîm eyledikden sonra sâlifü’z-zikr Hasan Reis zikr olunan emti‘ayı mezkûr zimmîye bey‘ini inkâr edip benim için sana bey‘ etmiş idim deyû meblağ-ı mezkûr elli beş bin akçeyi benden taleb eyledikde ben inkâr edip mâ-beynimizde nice def‘a nizâ‘ ve husûmet vâki‘ olmuş idi. Hâlâ mezbûr Hasan Reis zikr olunan emti‘ayı mezbûr zimmîye bey‘ini i‘tirâf etmişdir, suâl olunup ikrârı tahrîr olunmak taleb ederin dedikde gıbbe’s-suâl mezbûr Hasan Reis tav‘an ikrâr ve i‘tirâf edip fi’l-vâki‘ zikri sebk eden emti‘ayı târih-i mezkûrda mezkûr Aleksandra voyvodaya bey‘ ve teslîm edip mezbûr Baba Mehmed Çelebi’nin husûs-ı mezbûrda kat‘an a[lâ]kası olmayıp mezkûrdan eylediğim da‘vâ bî-vechdir eğer min ba‘d dahi da‘vâ edersem inde’l-hükkâm mesmû‘ olmaya dedikde tarafeynden sâdır olan kelâm bi’t-taleb kayd olundu. Tahrîren fi’l-yevmi’r-râbi‘ aşer min Cumâdelûlâ li sene selâse ve elf. Şuhûdü’l-hâl: Muharrem Çelebi b. Hüseyin el-müderris, Hoca Hüsrev b. Abdullah kethüdâ-yı Bezzâzistân-ı atîk, el-Hâc Mahmud b. el-Hâc Ali, Ahmed Çavuş b. Ömer, Mustafa b. Abdullah kethüdâ-yı arakiyyeciyân, Hüseyin Bey b. Emirhan el-cevherî-i sultânî, Mustafa Bey [b.] Abdullah ez-zevvâk, Yusuf Çavuş, Hasan Bey b. Abdullah, Usta Ali [b.] Mehmed, Mustafa Bey b. Abdullah ol dahi [tâbi‘-i Hoca Hüsrev mezbûr], Yusuf Bey b. Abdullah el-cündî, Osman Bey b. Abdullah bevvâb-ı sultânî, Rıdvan Bey b. Abdullah tâbi‘-i Hoca Hüsrev m[ezbûr], Kurd Çavuş b. Abdullah, el-Hâc Kābil b. Abdullah tâbi‘-i Hoca Hüsrev m[ezbûr], Zekeriya b. ( ) [tâbi‘-i] Hoca Hüsrev [mezbûr].