Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 69 Hüküm no: 22 Orijinal metin no: [11b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Reis’in Hasan b. Abdurrahman’a açtığı alacak davasından vazgeçmesi Mahmiye-i Kostantıniyye mahallâtından Kumkapısı kurbunda Nişancı Paşa mahallesinde sâkin işbu râfi‘ü’l-kitâb Hasan b. Abdurrahman nâm kimesne meclis-i şer‘-i şerîfe hâzır olup kasaba-i Kasımpaşa’da merhûm Surûrî Efendi mahallesinde sâkin hâssa re’îslerden Hasan Reis b. Mehmed mahzarında takrîr-i kelâm edip bundan akdem mezbûr Hasan Reis vilâyet-i Eflak voyvodası olan Aleksandra nâm zimmîye sene ihdâ ve elf Cemâziyelâhire’sinde kendi emlâkinden iki yüz bin fıddî-i Osmânî-i mev‘ûd akçeye Bosneviyyetü’l-asl Yasemin bt. Abdullah nâm bir câriye ve bir doru at ve mâ-beynlerinde ma‘lûm ba‘zı akmişe-i mütenevvi‘a bey‘ edip [ve] teslîm eyledikden sonra sâlifü’z-zikr Hasan Reis zikr olunan emlâki mezkûr voyvodaya bey‘ini inkâr edip benim için, sana bey‘ etmiş idim ve Dîvân-ı Hümâyûn kâtiblerinden işbu Baba Mehmed b. Mahmud meblağ-ı mezkûra kefîl olmuş idi deyû meblağ-ı mezbûru kâh benden asâleten ve kâh mezbûr Baba Mehmed Çelebi’den kefâleten da‘vâ edip biz dahi inkâr edip mâ-beynimizde nice nizâ‘ ve husûmet vâki‘ olmuş idi. Hâlâ mezbûr Hasan Reis zikr olunan emti‘ayı mesfûr voyvodaya bey‘ini i‘tirâf etmişdir, suâl olunmak taleb ederin dedikde gıbbe’s-suâl mezbûr Hasan Reis merkūmân Hasan ve Baba Mehmed mahzarlarında tav‘an ikrâr ve i‘tirâf edip fi’l-vâki‘ zikri sebk eden emti‘ayı târih-i mezbûrda mezbûr Aleksandra voyvodaya bey‘ ve teslîm edip husûs-ı mezbûrda merkūm Hasan’ın asâleten ve mezbûr Baba Mehmed Çelebi’nin kefâleten kat‘an alâkaları olmayıp mezbûrlardan asâleten ve kefâleten eylediğim da‘vâ bî-vech idi. Eğer min ba‘d dahi meblağ-ı mezbûra müte‘allik mezbûrlardan asâleten ve kefâleten da‘vâ edersem inde’l-hükkâm mesmû‘ olmaya dedikde tarafeynden sâdır olan kelâm bi’t-taleb ketb olundu. Tahrîren fi’t-târihi’l-mezbûr bi mahzari’s-sâbıkın. [Şuhûdü’l-hâl yazılmamıştır].