Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 69 Hüküm no: 23 Orijinal metin no: [12a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Baba Mehmed Çelebi’nin Hasan Reis’te olan alacağını tahsil etmesi Dîvân-ı refî‘ü’l-bünyân kâtiblerinden fahrü’l-akrân Baba Mehmed Çelebi b. Mahmud meclis-i şer‘-i şerîfe hâzır olup kasaba-i Kasımpaşa’da merhûm Surûrî Efendi mahallesinde sâkin hâssa re’îslerden işbu râfi‘ü’l-kitâb Hasan Reis b. Mehmed mahzarında takrîr-i kelâm edip bundan akdem sene ihdâ ve elf Cemâziyelâhire’sinde mezkûr Hasan Reis’e karz tarîki üzre kırk sekiz bin sekiz yüz akçe verip ba‘dehû bin sekiz yüz akçesin mezbûrdan istîfâ edip kırk yedi bin akçesi zimmetinde bâkī kalıp ba‘dehû meblağ-ı mezbûru taleb eylediğimde mezbûr Hasan Reis i‘tirâf edip lâkin meblağ-ı mezbûru bana edâdan imtinâ‘ etmekle mâ-beynimizde nice husûmet ve nizâ‘ vâki‘ olmuş idi. Hâlâ meblağ-ı mezkûr kırk yedi bin akçe mukābelesinde mezbûr Hasan Reis’in Abazaviyyetü’l-asl Meleksima bt. Abdullah nâm bir mülk câriyesin alıp kabz edip mezbûrun zimmetinde olan hakkımı bi’t-tamâm istîfâ edip meblağ-ı mezkûra müte‘allik mezbûr Hasan Reis’le kat‘an alâkam kalmamışdır. Eğer min ba‘d dahi benden husûs-ı mezbûra müte‘allik husûmet ve nizâ‘ sâdır olursa inde’l-hükkâm mesmû‘ olmaya dedikde mukırr-ı mezbûr Baba Mehmed Çelebi’nin kelâm-ı meşrûhunu sâlifü’z-zikr Hasan Reis vicâhen tasdîk edip vâki‘-i hâl gıbbe’s-suâl ketb ü kayd olundu. Tahrîren fi’t-târihi’l-mezbûr. Şuhûdü’l-hâl: Es-Sâbikūn.