Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 86 Hüküm no: 42 Orijinal metin no: [18a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muhsine bt. İsa’nın vefat eden zevci Abdurrahman b. Şem‘î’nin vakfından kendisine ayrılan tahsisatı aldığı Vilâyet-i Rumeli muzâfâtından Nevrekop nâm kasabada sâkine Muhsine bt. İsa nâm Hâtun tarafından husûs-ı âti’z-zikre Mehmed Çelebi b. Davud ve İbrahim b. Abdullah er-râcil şehâdetleriyle vekâleti sâbite olan Mehmed b. Mustafa nâm kimesne meclis-i şer‘-i refî‘ü’l-bünyâna hâzır olup mezbûre Muhsine Hâtun’un sâbıkan zevci olup vefât eden merhûm Abdurrahman b. Şem‘î er-râcil vakfına hâlâ mütevellî olan râfi‘ü’l-kitâb Mevlânâ Abdülkerim Çelebi b. Hasan mahzarında tav‘an ikrâr ve i‘tirâf edip vâkıf-ı merkūm zevâ’id-i vakfından zevci mezkûr Muhsine Hâtun’a ta‘yîn eylediği yevmî beş akçe vazîfeden sene elf ve sene ihdâ ve elf’de vâki‘ iki yıllık vazîfe ki, cem‘an üç bin altı yüz akçe olur mütevellî-i mezkûr yedinden meblağ-ı merkūmu müvekkilem mezbûre Muhsine Hâtun’a îsâl için alıp bi’t-tamâm kabz eyledim dedikde mukırr-ı mezbûrun vech-i meşrûh üzre olan ikrâr ve i‘tirâfını mütevellî-i mesfûr vicâhen tasdîk ve şifâhen tahkīk edip vâki‘-i hâl kayd olundu. Tahrîren fî evâhiri Receb sene isneteyn ve elf. Şuhûdü’l-hâl: Ahmed b. Hüseyin, Ahmed b. Abdullah, Mehmed Çelebi b. el-Hâc Fethi, Hasan Çelebi b. Murad.