Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 87 Hüküm no: 43 Orijinal metin no: [18a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Davud Paşa evkafına ait bahçenin kiracısı Şeyh Ali Kamilî’nin vakfa kira vermeyip bahçeyi harap ettiği El-emru alâ mâ-zubire fîhi, nemekahu’l-abdu’l-fakīr Ahmed b. Mahmud el-me’mûr bimâ-fîh -ufiye anhümâ-. Husûs-ı âti’l-beyân mahallinde görülmek fakīre tefvîz olunmağın mahmiye-i Kostantıniyye’de vâki‘ merhûm ve mağfûrun-leh Davud Paşa evkāfına hâlâ mütevellî olan kıdvetü’l-a‘yân Hüseyin Bey b. Abdülmennân ve nâzırı İbrahim Halîfe b. Şaban meclis-i şer‘de takrîr-i kelâm ve ta‘bîr-i merâm edip evkāf-ı mezbûreden olup merhûm-ı mezkûrun câmi‘-i şerîf civârında vâki‘ kadîmi yevmî on beş akçe icâreye verilegelen bir kıt‘a bağçeyi sâbık mütevellî olan Numan Çelebi b. Ahmed yevmî on akçe icâre nâmına Şeyh Ali Kamilî dimekle ma‘rûf bir şahsa sene ihdâ ve elf Muharremi’nde teslîm edip şeyh-i mezbûr zikr olunan bağçeyi bu minvâl üzre bir zamân tasarruf edip cânib-i vakfa bir akçe ücret vermeyip ba‘dehû şeyh sılasına gidip yerine Mehmed nâm bir sûfisin koyup mezbûrlar zikr olunan bağçenin üzüm çubukların ve asma ve kütüklerin ve kayısı ve şeftali ve armut ve sâir meyve ağaçların kesip yakıp ve duvarların ve iç havluların yıkıp ve odaların duvarların delip ve manzaraların koparıp yıkıp ve tahmînen yüzden ziyâde fidânların çıkarıp satıp ve kapısı demirin zâyi‘ edip meyve ağaçlarından gayrı sâfî binâya müte‘allik olan zararları tahmînen altı yedi bin akçe ile hâsıl olmayıp ve bi’l-cümle bağçeyi harâb edip hâlâ mezbûr sûfi dahi bir akçe vermeyip kimesne koymadın bırakıp gidip bağçe hâlî kalıp cânib-i vakfa azîm gadr etmişlerdir, üzerine varılıp hakīkat-i hâl keşf olunup tahrîr olunmasın taleb ederiz dediklerinde zeyl-i kitâbda mastûretü’l-esâmî olan ehl-i vukūf ve bî-garaz Müslimîn ile üzerine varılıp müşâhede olundukda fi’l-hakīka zikr olunan bağçe hâlâ harâba müşrif bulunup ve mukaddemâ ma‘mûr olup bu minvâl üzre harâb olması mezbûr şeyh zamânında olup mütevellî ve nâzırın takrîr-i sâlifleri hakk-ı vâki‘ idiğin zikr olunan ehl-i vukūf ve bî-garaz Müslimûn ihbâr etdiklerinde vâki‘-i hâl bi’t-taleb ketb olunup yed-i tâlibe vaz‘ olundu. Tahrîren fî evâsıtı Receb sene isneteyn ve elf. Şuhûdü’l-hâl: es-Seyyid Abdürrezzak b. es-Seyyid Abdülcelîl, İbrahim b. Hayreddin, Bâli Çelebi b. Sefer, Durmuş b. Sefer, Mustafa b. Abdullah, Ali b. Abdullah, Abdüzzahir b. Mustafa, Ahmed b. Abdullah el-kayyum, Mehmed b. Abdullah, Ahmed b. Murad, Ali b. Abdüllatîf, Cafer b. Abdullah ve gayruhüm.