Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 88 Hüküm no: 44 Orijinal metin no: [18b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Mahmud b. Ahmed’in el-Hâc Mustafa b. Ali’den alacaklı olduğu iddiasını ispatlayamadığı Oldur ki, el-Hâc Mahmud b. Ahmed nâm kimesne meclis-i şer‘-i şerîfe el-Hâc Mustafa b. Ali nâm kimesneyi ihzâr ve mahzarında takrîr-i kelâm edip bundan akdem el-Hâc Mustafa’dan altı yüz doksan akçeye işbu yeşil uzun yenli ferâceyi iştirâ edip kıymeti altı yüz doksan akçeyi teslîm edip hâlâ zikr olunan ferâceye benim yedimde iken Hüseyin b. el-Hâc İbrahim nâm kimesne müstehık çıkıp ba‘de’l-isbât ferâceyi benden ahz eylemişdir. Hâlâ meblağ-ı merkūmu mezkûr el-Hâc Mustafa’dan taleb ederin dedikde, gıbbe’s-suâl mezbûr el-Hâc Mustafa zikr olunan ferâceyi ben bey‘ etmedim deyû inkâr edip istişhâd olundukda müdde‘î-i mezbûr sıdk-ı makāline beyyine-i âdile ikāmetinden âciz olup tahlîf olunmasın taleb etmeğin, merkūm el-Hâc Mustafa zikr olunan ferâceyi bi vechin mine’l-vücûh bey‘ etmeyip alâkası olmadığına tahlîf olunup yemîn billâh etdikde mâ vaka‘a bi’t-taleb kayd olundu. Tahrîren fi’l-yevmi’l-hâdî ve’l-ışrîn min Recebi’l-mübârek sene isneteyn ve elf. Şuhûdü’l-hâl: Fahru’l-hutebâ Mevlânâ Mehmed Efendi b. Şeyh Nazar, Haydar Çavuş el-mübâşir, Hüseyin Çelebi b. Ali, Haydar b. Abdullah, Ahmed b. Hüseyin, Hüseyin [b.] Abdullah, Gazanfer b. Abdullah ve gayruhüm.