Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 53 Hüküm no: 39 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Papa Luka’nın bağını Elina’ya sattığı Medîne-i Üsküdar’a muzâfe Adalar nâhiyesine tâbi‘ Kartal karyesinde mütemekkin Papa Luka v. Yorgaki nâm zimmî meclis-i şer‘-i şerîf-i enverde işbu bâ‘isetü’s-sifr Elina bt. Kurniş v. Deyban tarafından ber-vech-i âtî tasdîka vekîl-i müsecceli Masturyani v. Kostandi nâm zimmî muvâcehesinde ikrâr ve takrîr-i kelâm edüp bey‘-i âti’z-zikrin vukū‘ına değin yedimde mülküm olup karye-i mezbûrede vâki‘ etrâf-ı erba‘ası Arpaoğlu Dimitri ve Terzi mülkü ve Dimitri mülkleri ve tarîk-i âm ile mahdûd fevkānî iki bâb oda ve iki sofa ve tahtânî iki bâb oda ve dehliz ve kenîf ve iki bi’r-i mâ ve tahtında ahır ve bir mahzen ve eşcâr-ı müsmire ve gayrı müsmireyi hâvî bahçeyi müştemil mülk menzilimi tarafeynden îcâb ve kabûlü hâvî bey‘-i bâtt-ı sahîh-i şer‘î ile bin iki yüz guruşa müvekkile-i mezbûre Elina’ya bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabûl edüp semeni olan meblağ-ı mezkûr bin iki yüz guruşu yedinden tamâmen ve kâmilen ahz ü kabz eyledim ba‘de’l-yevm menzil-i mahdûd-ı mezkûrda bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık aslâ benim alâka ve medhalim kalmayup müşteriye-i müvekkile-i mezbûre Elina Nasrâniyenin mülk-i müşterâsı ve hakk-ı sırfı olmuşdur dilediği gibi mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Şevvâli’l-mükerrem li-sene hamse ve sittîn ve mi’ete ve elf. Şuhûdü’l-hâl: el-Hâc Mustafa Ağa, el-Hâc Osman Ağa, İbrahim Beşe, Ahmed Çelebi, Hüseyin Ağa, el-Hâc Mustafa Ağa, Molla Kasım. Ligor [v.] Panayot, Yorgi v. Yani, Kostanti v. Kortiş. Müstedamzâde Nasrullah Efendi niyâbetinde kaydolunmayup bu mahâlle kaydolundu.