Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 91 Hüküm no: 50 Orijinal metin no: [19a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Haydar Paşa evkâfına borçlu olarak vefat eden Mustafa’nın borcunun muhallefâtından tahsili Mahmiye-i Kostantıniyye’de vâki‘ merhûm Haydar Paşa Evkāfına hâlâ mütevellî olan Sinan Bey b. Abdullah nâm kimesne Nişancı Paşa mahallesinde sâkin Hasan Bey b. Ali nâm kimesneyi ihzâr ve mahzarında takrîr-i kelâm edip bundan akdem mahalle-i mezbûrede vefât eden merhûm Mustafa nâm kimesne zimmetinde vakf-ı mezbûr mâlından on bin akçe olup ba‘dehû müteveffâ-yı mezbûrun kebîr oğlu Süleyman ve kebîre kızı Fâtıma babalarının muhallefâtından mahalle-i mezkûrede vâki‘ lede’l-ahâlî ma‘lûmetü’l-hudûd olan menzili merkūm Hasan Bey’e kırk beş bin akçeye bey‘ eylediklerinde, babalarının vakf-ı mezbûra olan on bin akçe deynini mezbûr Hasan Bey’den bi’l-muvâcehe havâle edip ben ve mezbûr Hasan râzı olmuş idik, hâlâ meblağ-ı mezbûru vakf için taleb ederin suâl olunsun dedikde, gıbbe’s-suâl ve akībe’l-inkâr ve’l-istişhâd udûl-i Müslimînden Sinan Bey b. Abdullah el-cündî ve İshak b. Bâli nâm kimesneler li ecli’ş-şehâde mahfil-i kazâya hâzırân olup fi’l-vâki‘ mezbûrân Süleyman ve Fâtıma babalarından kendilere intikāl eden menzil-i mezkûru merkūm Hasan Bey’e kırk beş bin akçeye bey‘ eylediklerinde on bin akçesin babalarının zikr olunan Haydar Paşa Vakfı’na olan deynine bi’l-muvâcehe havâle edip tarafeyn dahi râzı olmuşlar idi. Biz bu husûsa şâhidleriz, şehâdet dahi ederiz dediklerinde, mezbûrânın şehâdetleri ba‘de’t-ta‘dîl hayyiz-i kabûlde vâkı‘a olduğu mâ vaka‘a bi’t-taleb [ketb olundu]. 23 min Şa‘bân [sene isneteyn ve elf]. Şuhûdü’l-hâl: (…) [Sefer] b. Mahmud, Davud b. Abdullah, Ahmed b. Abdullah, el-Hâc Mehmed el-muhzır, Veli Efendi b. Sinan el-kadı, Süleyman [b.] Abdullah.