Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 97 Hüküm no: 57 Orijinal metin no: [20b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rukiye bt. Abdullah’ın boşandığı kocası Mahmud b. Hasan’dan alacaklarını tahsil ettiği Mahmiye-i Kostantıniyye’de vâki‘ merhûm Mahmud Paşa Câmi‘i mahallesinde sâkine Rukiye bt. Abdullah nâm hâtun tarafından husûs-ı âti’z-zikre Halil b. Abdullah ve el-Hâc Ahmed b. Abdurrahman şehâdetleriyle vekâleti sâbite olan Esma bt. Mehmed nâm hâtun meclis-i şer‘-i refî‘ü’l-erkâna hâzıra olup müvekkile-i mezkûre Rukiye’nin zevc-i mutalliki olan işbu râfi‘ü’l-kitâb Mahmud b. Hasan nâm kimesne mahzarında takrîr-i kelâm edip müvekkilem merkūme Rukiye’nin zevc-i mutalliki olan mesfûr Mahmud zimmetinde altı bin akçe mehr-i müeccelinden ve iki bin akçe bir telli hâre kaftan bahâsından cem‘an sekiz bin akçe hakkı olup meblağ-ı mezbûru vekâleten da‘vâ etdiğimde merkūm Mahmud meblağ-ı mezkûru tav‘an i‘tirâf edip lâkin mehr-i müeccelden olan altı bin akçeden üç bin akçesin kable’t-tatlîk merkūme Rukiye bana hibe edip ve mezkûr olan üç bin akçeyi da‘vâdan zimmetim ibrâ eylemiş idi deyû benim mahzarımda isbât edip zimmetinde beş bin akçe bâkī kalmış idi. Hâlâ zikr olunan beş bin akçeyi müvekkilem mesfûre Rukiye zevc-i mutalliki olan sâlifü’z-zikr Mahmud yedinden bi’t-tamâm kabz ve tesellüm edip zimmetin husûs-ı mezbûra müte‘allik cemî‘-i da‘âvâdan ibrâ ve ıskāt etmişdir deyû ikrâr ve i‘tirâf eyledikde vekîl-i mezkûrenin vech-i meşrûh üzre olan cemî‘ kelâmını mukırrûn-leh mezbûr Mahmud vicâhen tasdîk edip vâki‘-i hâl bi’t-taleb ketb olundu. Tahrîren fî evâsıtı Şa‘bân sene isneteyn ve elf. Şuhûdü’l-hâl: Abidin Çavuş b. Mustafa el-mübâşir, İbrahim [b.] Abdullah, Derviş b. Abdullah, Hüsrev b. Abdullah, Süleyman b. Mahmud.