Bab Mahkemesi 54 Numaralı Sicil (H. 1102 / M. 1691) cilt: 20, sayfa: 160 Hüküm no: 162 Orijinal metin no: [26a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer b. Abdullah ile Yusuf Çelebi b. Ahmed’in alacak davasında sulh olması Mahmiye-i İstanbul’da Avcı Bey mahallesinde sâkine Yusuf Çelebi b. Ahmed meclis-i şer‘-i şerîf-i enverde Cafer b. Abdullah mahzarında ikrâr ve i‘tirâf edip, mezbûr Cafer’in gāib ani’l-meclis Yusuf b. Abdullah’a ma‘lûmü’l-vezn don yağı bahâsından altı bin dokuz yüz yirmi dört akçe deyni olup, meblağ-ı mezbûra mezkûrun emriyle ben vekâlet-i sahîha-i şer‘iyye ile kefîl ve bi hükmi’l-kefâle mezbûre el-Hâc Yusuf’a mâlımdan edâ ve teslîm etmekle, hâlâ meblağ-ı mezbûru taleb ve da‘vâ eylediğimde beynimizde münâza‘ât-ı kesîre cereyân etmiş idi. El-hâletü hâzihî muslihûn tavassut edip, da‘vâ-yı mezkûremden mezkûr Cafer ile beynimizde iki bin akçe üzerine sulh eylediklerinde, ben dahi sulh-ı mezbûru ve bedel-i sulh olan meblağ-ı mezbûr iki bin akçeyi yedinden alıp kabz edip, ziyâde[ye] müte‘allika cemî‘ da‘vâdan mezbûrun zimmetini ibrâ ve iskāt eyledim dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb [ketb olundu]. Fi’l-yevmi’s-sânî min Cumâdelâhire sene 1102. Şuhûdü’l-hâl: Mustafa Çelebi b. İbrahim, el-Hâc İbrahim b. el-Hâc Mustafa, İbrahim Çelebi b. Ahmed, Osman Çelebi b. Şaban.