Bab Mahkemesi 54 Numaralı Sicil (H. 1102 / M. 1691) cilt: 20, sayfa: 161 Hüküm no: 163 Orijinal metin no: [26a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Halil b. Hacı Receb’in Mehmed Ağa b. Ahmed’e borçlu olması Vilâyet-i Anadolu’da Eğin kazâsına tâbi‘ Meşreke nâm karye sükkânından işbu bâ‘isü’l-kitâb Mehmed Ağa b. Ahmed meclis-i şer‘-i şerîfde, yine karye-i mezbûre ahâlîsinden mahmiye-i İstanbul’da Cebealikapısı kurbunda müsâferet vechi üzre sâkin iken hâlâ fevt olan el-Hâc Halil b. el-Hâc Receb b. Ahmed’in evlâd-ı sıgār-ı Mehmed ve Ayşe ve Sâliha’nın tesviye-i umûrları için min kıbeli’l-eb vasî olmağla tereke-i müteveffâ-yı mezbûra vaz‘-ı yed eden Mehmed Ağa [b.] el-Hâc Receb mahzarında üzerine da‘vâ ve takdîr-i kelâm edip, mezbûr el-Hâc Halil târih-i kitâbdan yirmi beş gün mukaddem hâl-i hayâtında yüz esedî guruş ikrâz ve teslîm, ol dahi iktirâz ve kabz edip, hattâ meblağ-ı mezbûr bana zimmetinde lâzımü’l-edâ deyni olduğunu alâ ru’ûsi’l-işhâd ikrâr ve işhâd dahi edip, kable’l-edâ fevt olup tereke-i vâfiyesin mezbûr Mehmed Ağa kabz etmeğin, suâl olunup terekesinden deyn-i mezbûru bana edâya tenbîh olunması matlûbumdur dedikde, gıbbe’s-suâl mezbûr Mehmed Ağa cevâbında, fi’l-hakīka tereke-i müteveffâ-yı mezbûra vaz‘-ı yedini ikrâr, lâkin deyn-i mezbûru inkâr edicek müdde‘î-i mezbûrdan müdde‘âsına beyyine taleb olundukda, udûl-i müslimînden olup yine mahalle-i mezbûrede sâkin Süleyman Ağa b. el-Hâc Osman ve el-Hâc Mehmed [b.] Hüseyin li ecli’ş-şehâde meclis-i şer‘a hâzırân olup isre’l-istişhâd, fi’l-vâki‘ müteveffâ-yı mezbûr el-Hâc Halil b. el-Hâc Receb b. Ahmed târih-i mezbûrda hâl-i hayâtında, işbu müdde‘î-i mezbûrdan yüz esedî guruş istikrâz ve kabz eyledim ve meblağ-ı mezbûr zimmetimde lâzımü’l-edâ ve vâcibü’l-kazâ deynimdir deyu bizim huzûrumuzda ikrâr ve bizi işhâd etmiş idi. Biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye eylediklerinde, gıbbe’t-ta‘dîl ve’t-tezkiye şehâdetleri makbûle olmağın, ba‘de’t-tahlîfi’ş-şer‘î mûcebiyle ba‘de’l-hükm, işbu vesîka bi’t-taleb ketb olundu. Fi’l-yevmi’r-râbi‘ min Cumâdelâhire li sene isneteyn ve mi’e ve elf. Şuhûdü’l-hâl: Mehmed Efendi b. Mustafa, İbrahim Çelebi b. Muharrem, Ahmed Çelebi b. Ahmed, Mustafa b. Şaban, Ali b. Bâli ve gayruhüm.