Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 121 Hüküm no: 96 Orijinal metin no: [26b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüsam Bey’in, Musli Çavuş’un malından olup Hamza Bey’den emanet olarak aldığı parayı teslim etmesi Oldur ki, Mahmiye-i Kostantıniyye’de Kürkçübaşı mahallesinde sâkin Hamza Bey b. Hüseyin nâm kimesne meclis-i şer‘a Dergâh-ı âlî alemdârlarından Hüsam Bey b. Abdullah nâm kimesneyi ihzâr ve mahzarında takrîr-i kelâm edip bundan akdem Dergâh-ı âlî çavuşlarından Karanohudzâde dimekle ma‘rûf Musli Çavuş’un mâlından emriyle merkūm Hüsam Bey’e emânet tarîkiyle otuz bin akçe teslîm eylemişdim, hâlâ suâl olunmasın taleb ederim dedikde, gıbbe[’s-suâl] merkūm Hüsam Bey i‘tirâf edip fi’l-vâki‘ sâbıkan sâlifü’z-zikr Musli Çavuş’un mâlından emânet tarîkiyle merkūm Hamza yedinden otuz bin akçe kabz eylemişdim, lâkin meblağ-ı merkūmu bi’t-tamâm geri sâhib-i mâl olan mezkûr Musli Çavuş’a teslîm eyleyip, bende meblağ-ı mezbûrdan bir akçe bâkī kalmamışdır dedikde vâki‘-i hâl bi’t-taleb ketb olundu. Fi’t-târihi’l-mezbûr. Şuhûdü’l-hâl: Es-Sâbikūn.