Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 131 Hüküm no: 108 Orijinal metin no: [29b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cündibaşı Mehmed Ağa’nın ölen Hasan b. Abdullah’ta olan alacağını muhallefâtından tahsili Cündîbaşı dimekle ma‘rûf işbu sâhibü’l-kitâb kıdvetü’l-a‘yân Mehmed Ağa b. Abdülmennân tarafından husûs-ı âti’z-zikre Mehmed b. Abdullah el-müteferrika ve diğer Mehmed Bey b. Abdullah el-cündî şehâdetleriyle vekâleti sâbite olan Süleyman Bey b. Abdülmennân dîvân-ı refî‘ü’l-bünyâna hâzır olup mahmiye-i Kostantıniyye’de hâlâ beytülmâl-ı hâs emîni olup Küçük Ayasofya mahallesinde bundan akdem vefât eden Hasan b. Abdullah nâm kimesnenin muhallefâtına vâzı‘u’l-yed olan Mehmed Çelebi mahzarında takrîr-i kelâm edip bundan esbak müvekkilim mesfûr Mehmed Ağa kendi mâlından mezkûr Hasan’a hâl-i hayâtında işbu elmas kaşlı bir altın hâtemi ve bu beş aded yakut-ı ahmeri ve bu altı aded fîrûzeyi satıver deyû teslîm edip ve bu altın yaldızlı bir Dımaşkī kalkan göbeği ile bir gümüşlü varsak bıçağını dört bin akçe deyni mukābelesinde rehin vaz‘ edip, ba‘dehû merkūm Hasan vefât etmekle zikr olunan emti‘aya emîn-i mezkûr vâzı‘u’l-yed olmuşdur. Hâlâ vekâleten taleb ederin dedikde gıbbe’s-suâl ve akībe’l-inkâr ve’l-istişhâd udûl-ı Müslimînden Mehmed Ağa b. Abdullah ez-zevvâk ve Osman Çavuş b. Hüseyin nâm kimesneler fi’l-vâki‘ müvekkil-i merkūm Mehmed Ağa müteveffâ-yı mezkûra hâl-i hayâtında bizim huzûrumuzda işbu zikr olunan hâtem ve cevâhiri satıver deyû teslîm edip ve zikr olunan kalkan göbeği ile varsak bıçağını dört bin akçe deyni mukābelesinde rehin vaz‘ eylemişdir. İşbu zikr olunan merkūm Mehmed Ağa müteveffâ Hasan’a hâl-i hayâtında minvâl-i meşrûh üzre teslîm ettiği emti‘adır, biz bu husûsa şâhidleriz, şehâdet dahi ederiz dediklerinde mezbûrânın şehâdetleri ba‘de’t-ta‘dîl hayyiz-i kabûlde vâkı‘a olup mâ vaka‘a bi’t-taleb ketb olundu. Tahrîren fî evâhiri Ramazan sene 1002. Şuhûdü’l-hâl: Hasan b. Abdullah, Ahmed b. Hüseyin, Mehmed b. Mahmud, Ahmed b. Abdullah, Mehmed Bey el-cündî, İbrahim Çavuş, Hızır b. Abdullah.