Bab Mahkemesi 54 Numaralı Sicil (H. 1102 / M. 1691) cilt: 20, sayfa: 163 Hüküm no: 166 Orijinal metin no: [26b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çavuş b. Süleyman’ın terekesinin karısı İsmihân bt. Hızır’a teslim olunması Havâss-ı Aliyye kazâsına tâbi‘ Otakçılar mahallesi ahâlîsinden olup sefer-i hümâyûnda diyâr-ı Erdel’de vefât eden Ali Çavuş b. Süleyman verâseti, zevce-i metrûkesi İsmihân bt. Hızır ve sulbî sagīr oğlu Mehmed’e münhasıra olduğu şer‘an mütehakkik oldukdan sonra zâtı Mehmed Beşe b. Ahmed ve Ebûbekir b. Hüseyin ta‘rîfleriyle mu‘arrefe olan mezbûre İsmihân Hâtun kendi tarafından asâleten ve sagīr oğlu Mehmed’in tesviye-i umûruna mansûbe vasîsi olmağla dahi vesâyeten meclis-i şer‘-i şerîf-i enverde, mahmiye-i İstanbul’da Emir Buharî mahallesinde sâkine işbu bâ‘isü’l-kitâb Mehmed Ağa b. Abdullah mahzarında ikrâr ve takrîr-i kelâm edip, mezbûr Ali Çavuş diyâr-ı mezkûrede fevt oldukda mezbûr Mehmed Ağa refîki olmağla terekesinden üç bin yüz elli akçe ve on iki yaldız altını bi tarîki’l-emâne kabz ve tesellüm edip ve muhallefâtından bir mühür Hâtem ve bir sagīr yüzük ve bir atîk cüzdân dahi kabz etmişdi. Hâlâ mezbûr Mehmed Ağa ber vech-i mezkûr makbûzu olan üç bin yüz iki akçeyi ve on iki yaldız altını ve zikr olunan Hâtem ve yüzük ve cüzdân bana def‘ ve teslîm, ben dahi asâleten ve vesâyeten bi’t-tamâm yedinden ahz u kabz edip, min ba‘d meblağeyn-i mezkûreyn ve eşyâ-yı mezkûreden merkūm Mehmed Ağa’nın yedinde ve kıbelinde bir akçe ve bir habbe bâkī kalmamışdır dedikde, gıbbe’t-tasdîki’l-vicâhî mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Ahmed b. Süleyman, Hasan Beşe b. Mahmud, Mustafa Efendi b. Dilaver, Mehmed Beşe b. Ahmed, Ebûbekir b. Hüseyin.