Bab Mahkemesi 54 Numaralı Sicil (H. 1102 / M. 1691) cilt: 20, sayfa: 163 Hüküm no: 167 Orijinal metin no: [26b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Mehmed’in mirasında varislerin sulh olması Vilâyet-i Anadolu’da Akçaşehir kazâsına tâbi‘a Kemermendi? nâm karye sükkânından olup hâlâ mahmiye-i İstanbul’da el-Hâc Ferhad mahallesinde sâkine iken bundan akdem vefât eden Mehmed b. Mehmed b. Ali’nin verâseti, vâlidesi Mevcude nâm hâtun ile li ebeveyn er karındaşları Osman ve Hasan ve Ahmed ve kız karındaşları Ayşe ve Fâtıma’ya münhasıra olduğu şer‘an zâhir ve mütehakkik oldukdan sonra mezbûr Osman kendi tarafından asîl ve er karındaşları mezbûrân Hüseyin ve Ahmed ve kız karındaşları mezbûretân Fâtıma ve Ayşe ve vâlide-i merkūme Mevcude taraflarından husûs-ı âti’l-beyânı ikrâra vekîl olduğu zât-ı mezbûrânı ma‘rifet-i şer‘iyye ile ârifân yine karye-i mezbûre sükkânından Mehmed b. Nimetullah ve Musli b. Ramazan nâm kimesneler şehâdetleriyle şer‘an sâbite oldukdan sonra meclis-i şer‘-i şerîf-i enverde, müteveffâ-yı mezbûrun terekesine vâzı‘u’l-yed olan yine mahalle-i mezbûre sükkânından Abdürrahim b. ( ) tarafından husûs-ı [27a] âti’l-beyâna vekîl olduğu Ali Efendi b. Mustafa ve Mehmed Efendi b. Osman şehâdetleriyle şer‘an sâbite ve sübût-ı vekâletine hükm-i şer‘î lâhık olan Mehmed Çelebi b. Ali nâm kimesne mahzarında ikrâr ve takrîr-i kelâm edip, tereke-i müteveffâ-yı mezbûrdan olmak üzre ma‘lûmü’l-mikdâr eşyâ ile on üç aded yaldız altını hâlâ yedindedir deyu müvekkil-i mezbûrâna bi’l-asâle ve bi’l-vekâle taleb ve da‘vâ eylediğimde, beynimizde münâza‘ât-ı kesîre cereyânından sonra muslihûn tavassut edip da‘vâ-yı mezkûrundan yüz üç guruş ile dört guruş kıymetli bir kılıç ve bir yeşil çukaya kaplı kuzu derisi kürkü ve bir köhne kavuk ve bir köhne sarık ve ketanî çintiyân ve bir köhne hilâlî kuşak ve bir köhne siyah kapama üzerine sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı mezbûr üç guruş ile eşyâ-i muharrere-i mezkûreyi müvekkil-i merkūm Abdurrahman Efendi yedinden asâleten ve vekâleten tamâmen ahz u kabz ettiğimden sonra tereke-i müteveffâ-yı mezbûra müte‘allika âmme-i da‘vâ-yı münâza‘ât ve eymân-ı muhâsamâtdan müvekkil-i mezbûr Abdurrahman Efendi’nin zimmetini ibrâ-i âmm-ı kātı‘ü’n-nizâ‘la asâleten ve vekâleten ibrâ ve iskāt eyledim dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fî gurreti Cumâdelâhire li sene isneteyn ve mi’e ve elf. Şuhûdü’l-hâl: Ali Efendi b. Osman, Mahmud Efendi b. Osman, Mustafa b. Şaban, İbrahim b. Ahmed.