Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 138 Hüküm no: 119 Orijinal metin no: [31a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hançerli Sultan Vakfı eski mütevellisi Mahmud Bey’in vakfa ait hanı satarak parasını yediği iddiasına karşılık buranın kendi mülkü olduğunu beyan etmesi Mahrûsa-i Bursa’da vâki‘ merhûme Hançerli Sultan Vakfı’na evlâdından hâlâ mütevellî olan işbu râfi‘ü’l-kitâb Abdullah Bey b. Kasım Bey nâm kimesne meclis-i şer‘-i şerîfe vakf-ı mezbûra kendiden mukaddem mütevellî olan karındaşı Mahmud Bey b. Kasım Bey nâm kimesneyi ihzâr ve mahzarında takrîr-i kelâm edip bundan akdem sâlifü’z-zikr Mahmud zamân-ı tevliyetinde vakf-ı mezbûrdan olup mahmiye-i İstanbul’da Atmeydanı kurbunda vâki‘ Hançerli Sultan Hânı dimekle ma‘rûf lede’l-ahâlî ma‘lûmetü’l-hudûd olan vakf hânı bi gayrı tarîk-i şer‘î sâbıkan cebecibaşı olan Halil Ağa’ya üç yüz bin akçeye satıp akçesin alıp ekl u bel‘ edip cânib-i vakfa ziyâde gadr eylemişdir suâl olunsun dedikde, gıbbe’s-suâl merkūm Mahmud Bey cevâb verip fi’l-vâki‘ zikr olunan hânı ben merkūm Halil Ağa’ya üç yüz bin akçeye satıp akçesin kabz eyledim. Lâkin zikr olunan hân vakf olmayıp babam mezbûr Kasım Bey’in mülkü olup bana hâl-i hayâtında hibe ve teslîm eylemiş idi. Hân-ı mezbûr benim bu tarîk üzre mülk-i mevhûbum olmağın bey‘ eyledim dedikde mezbûr Mahmud Bey vech-i meşrûh üzre olan kelâmı mütevellî-i merkūm Abdullah Bey talebiyle ketb olundu. Tahrîren fî evâsıtı Ramazan sene 1002. Şuhûdü’l-hâl: Es-Sâbikūn.