Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 138 Hüküm no: 120 Orijinal metin no: [31a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Subaşı b. Hüseyin’in, evini Şâhidyedâr? Hatun bt. merhûm Ahmed Paşa’ya istiğlâl yoluyla sattığı Fahrü’l-akrân Mehmed Subaşı b. Hüseyin meclis-i şer‘-i şerîfde hâzır olup, âtiyyü’z-zikr menzilini râfi‘a-i hâze’l-kitâb Şâhidyedâr? Hâtun bt. merhûm Ahmed Paşa’ya bey‘ ettiğini ikrâr ve i‘tirâf etti. Müşteriyye-i mezbûre de istiğlâl maksadıyla, bâyi‘-i merkūmun işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu, mahmiye-i Kostantıniyye mahallâtından Arabacı Bayezid mahallesinde vâki‘ olan, her birinde müte‘addid beytleri hâvî iki avluyu müştemil, bir taraftan el-Hâc Mustafa b. Mehmed mülkü, diğer taraftan Mehmed b. Şîrmerd mülkü ve merhûm Arabacı Bayezid vakfı ve iki taraftan da tarîk-ı âm ile mahdûd cemî‘-i menzili cümle tevâbi‘ ve levâhıkı ile râyicü’l-vakt kırk bin akçe semen-i mu‘ayyen-i makbûz ile iştirâ etti. Bâyi‘-i mezbûrun menzil-i merkūmu icâreye almak istemesi üzerine müşteriyye-i mezkûre ba‘de’t-tahliye ve’t-tekābuz zeyl-i kitâbda mezkûr târihden i‘tibâren altı ay tamâmına iki bin akçe ücret-i kirâ ile icâreye verdi. Vâki‘ ikrâr, müşteriyye-i merkūme kıbelinden tasdîke vekâleti Muharrem b. Kemal el-İmâm ve Mehmed b. İlyas el-müezzinin şehâdetleri ile sâbit olan el-Hâc Ahmed b. Yusuf tarafından vicâhen ve şifâhen tasdîk edildi. Sonra el-Hâc Hasan b. Hamza ve el-Hâc Hasan b. Behrâm nâm kimesneler menzil-i mezbûrun derkine ve ücret-i merkūmeye îcâb ve kabûlü hâvî kefâletle kefîl oldu. Cerâ zâlike ve hurrire fi’l-yevmi’s-sâbi‘ min şehri Ramazan el-mübârek sene isneteyn ve elf. Şuhûdü’l-hâl: Hamza b. Fethullah el-İmâm, Mehmed b. Mehmed el-müezzin, Bilal b. Sinan, Ahmed b. Mustafa, Ahmed b. Hamza, Arslan b. Abdullah