Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 139 Hüküm no: 121 Orijinal metin no: [31a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Lalezâr’ın evini satmak üzere Mustafa Ağa b. Kubad’a vekalet vermesi Bundan akdem Diyarbekir defterdârlığından munfasıl olan kıdvetü’l-ekârim Ahmed Çelebi b. Lâlezâr meclis-i şer‘a hâzır olup hâlâ çavuşbaşılıkdan mütekā‘id zübdetü’l-emâcidi’l-kirâm Mustafa Ağa b. Kubad mahzarında bi’t-tav‘ ve’r-rızâ ikrâr ve i‘tirâf edip bundan akdem mahmiye-i İstanbul’da merhûm ve mağfûrun-leh Sultan Süleyman Hân Câmi‘-i Şerîfi kurbunda Eski Saray duvarı köşesi taşrasında vâki‘ lede’l-ahâlî ma‘lûmetü’l-hudûd olan mülk menzilimi bahâsıyla âhar kimesneye bey‘-i bâtt-ı sahîh ile bey‘ edip ve semenini kabz edip bana îsâl etmeğe kendi kıbelimden müşârun-ileyh Mustafa Ağa’yı vekîl nasb ve ta‘yîn edip mûmâ-ileyh Mustafa Ağa dahi vekâlet-i merkūmeyi kabûl ve mûcebini mültezim olmuş idi dedikde, mukırr-ı mezbûrun vech-i meşrûh üzre olan kelâmın sâlifü’z-zikr Mustafa Ağa vicâhen tasdîk ve şifâhen tahkīk edip vâki‘-i hâl gıbbe’s-suâl ketb olundu. Tahrîren fi’l-yevmi’t-tâsi‘ aşer min Ramazâni’l-mübârek sene isneteyn ve elf. Şuhûdü’l-hâl: Hacı Mehmed b. Osman el-mütevellî, Ömer Çavuş eş-şehîr bi Kazgancızâde, Hasan Bey b. Durak ez-zevvâk, Mehmed Ağa el-müteferrika, Receb Efendi el-kadı, Hasan Ağa sermuhzırân.