Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 146 Hüküm no: 129 Orijinal metin no: [32b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hatun bt. Ferhad Ağa ile kız kardeşi Ümmügülsüm’ün anneleri Bedia Hatun’dan kalan miras ile ilgili davaları Oldur ki, mahmiye-i Kostantıniyye mahallâtından Kırkçeşme mahallesinde sâkine fahrü’l-muhadderât Ayşe Hâtun bt. Ferhad Ağa tarafından husûs-ı âti’z-zikre nehc-i şer‘î üzre vekâleti sâbite olan fahrü’l-akrân Mustafa Çavuş b. Abdullah meclis-i şer‘-i şerîfe hâzır olup mezbûre Ayşe’nin li-ebeveyn kız karındaşı zahrü’l-muvakkarât Ümmügülsüm Hâtun’un husûs-ı mezkûra vekîl-i şer‘îsi ve zevci olan mefharü’l-eşbâh Ali Bey b. Abdullah mahzarında takrîr-i kelâm edip müvekkiletân-ı mezbûretân anaları merhûme Bedia Hâtun’dan irs-i şer‘le intikāl eden muhallefâta müte‘allik mezbûre Ümmügülsüm kız karındaşı merkūme Ayşe ile da‘vâ etmek istedikde, mezbûre Ayşe Hâtun benim zevcim sefer-i sultânîdedir, hâlâ benim da‘vâ ve husûmete zevcim gelince iktidârım yokdur deyû muhâsamadan imtinâ‘ etmeğin mesfûre Ümmügülsüm dahi mezkûre Ayşe Hâtun’un zevci gelince te’hîr-i da‘vâ edip ve mesfûre Ayşe merkūme Ümmügülsüm’e emânet tarîkiyle yetmiş bin akçe teslîm edip mezbûre Ümmügülsüm Hâtun dahi meblağ-ı mezbûru emâneten kabz ve tesellüm etmişdir dedikde, vekîl-i mesfûrun vech-i meşrûh üzre olan kelâmın vekîl-i âhar vicâhen tasdîk edip vâki‘-i hâl gıbbe’s-suâl ketb olundu. Tahrîren fî evâsıtı Ramazan sene 1002. Şuhûdü’l-hâl: Fahru’l-akrân Hüseyin Ağa el-müteferrika, Zahrü’l-a‘yân İbrahim Kethüdâ el-müteferrika, Kıdvetü’l-emâcid Hüseyin Çavuş, Mehmed b. Abdullah, Mevlânâ Mehmed Efendi el-kadı, Ali Bey b. Mustafa el-cündî, Cafer b. Abdullah, Ahmed b. Mehmed el-attâr, İbrahim b. Ebûbekir, Abdi Çavuş, İsmail b. Abdullah, Piyâle b. Abdullah, Ömer b. Behrâm, Suhrab b. Abdullah.