Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 146 Hüküm no: 130 Orijinal metin no: [33a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Keyvan b. Abdullah’ın Niğde Sancakbeyi Suhrab Bey’de değerli taşlarla süslü ayna satışından alacağı olduğu Mahmiye-i Kostantıniyye mahallâtından Nevbethâne mahallesinde sâkin işbu râfi‘ü’l-kitâb Keyvan b. Abdullah el-hakkâk meclis-i şer‘a hâlâ livâ-i Niğde Beyi olan umdetü’l-umerâ’i’l-kirâm Suhrab Bey b. Behrâm’ı ihzâr ve mahzarında takrîr-i kelâm edip müşârun-ileyh Suhrab Bey zimmetinde târih-i kitâb Ramazan’ının on beşinci gününe mev‘ûd bir altın taraklı cevherî mülk âyine bahâsından yüz otuz bin akçe hakkım olup hâlâ ecel-i mezkûr hulûl etmeğin meblağ-ı mesfûru taleb ederin suâl olunsun dedikde, gıbbe’s-suâl müşârun-ileyh Suhrab Bey tav‘an ikrâr ve i‘tirâf edip fi’l-vâki‘ sâbıkda merkūm Keyvan’dan zikr olunan âyineyi yüz otuz bin akçeye iştirâ etmiş idim, lâkin akçesin sancağıma vardıkda vermek üzre iştirâ eylemiş idim dedikde mûmâ-ileyh Suhrab Bey’den sâdır olan kelâm vukū‘u üzre merkūm Keyvan talebi ile ketb olundu. Tahrîren fî 27 min Ramazan sene 1002. Şuhûdü’l-hâl: Süleyman Çavuş b. Hızır el-mübâşir, Mehmed Çavuş b. Kasım, Mehmed b. Cârullah el-hakkâk, Hasan b. Mehmed el-hakkâk, Mustafa b. Abdullah er-râcil, Mustafa b. Hüseyin el-hakkâk, Mehmed b. Behrâm el-hakkâk, Mustafa b. Ahmed.