Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 147 Hüküm no: 131 Orijinal metin no: [33a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Veli b. Mustafa’nın Niğde Sancakbeyi Suhrab Bey’de altın kemer kuşak satışından alacağı olduğu Hâssa zergerlerden işbu râfi‘ü’l-kitâb el-Hâc Veli b. Mustafa nâm kimesne meclis-i şer‘-i şerîfe hâlâ livâ-i Niğde Bey’i olan kıdvetü’l-umerâ’ Suhrab Bey b. Behrâm’ı ihzâr ve mahzarında takrîr-i kelâm edip mûmâ-ileyh Suhrab Bey zimmetinde târih-i kitâb Ramazan’ı gurresine mev‘ûd bir cevherî altınlı kemer kuşak bahâsından üç yüz altmış bin akçe hakkım olup hâlâ ecel-i mezkûr hulûl etmeğin meblağ-ı mesfûru taleb ederin suâl olunsun dedikde, gıbbe’s-suâl mezkûr Suhrab Bey tav‘an ikrâr ve i‘tirâf edip fi’l-vâki‘ sâbıkda merkūm el-Hâc Veli’den zikr olunan kuşağı üç yüz altmış bin akçeye iştirâ eylemiş idim, lâkin meblağ-ı mezbûru sancağıma vardıkda edâ etmek üzre iştirâ eyledim dedikde müşârun-ileyh Suhrab Bey’den sâdır olan kelâm vukū‘u üzre merkūm el-Hâc Veli talebiyle ketb olundu. Tahrîren fi’t-târihi’l-mezbûr. Şuhûdü’l-hâl: Es-Sâbikūn.