Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 147 Hüküm no: 132 Orijinal metin no: [33a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer b. Abdullah’ın Niğde Sancakbeyi Suhrab Bey’de değerli taşlarla süslü hançer satışından alacağı olduğu Mahmiye-i Kostantıniyye mahallâtından Karabaş mahallesinde sâkin işbu râfi‘ü’l-kitâb el-Hâc Cafer b. Abdullah nâm kimesne meclis-i şer‘-i şerîfe hâlâ livâ-i Niğde Bey’i olan kıdvetü’l-ümerâ’i’l-kirâm Suhrab Bey b. Behrâm’ı ihzâr ve mahzarında takrîr-i kelâm edip sâlifü’z-zikr Suhrab Bey zimmetinde târih-i kitâb Ramazan’ının on beşinci gününe mev‘ûd elli miskāl altınlı bir cevherî mülk hançer bahâsından iki yüz kırk bin akçe hakkım olup, hâlâ ecel-i mezkûr hulûl etmeğin meblağ-ı mesfûru taleb ederin suâl olunsun dedikde, gıbbe’s-suâl mezbûr Suhrab Bey tav‘an ikrâr ve i‘tirâf edip fi’l-vâki‘ sâbıkda merkūm el-Hâc Cafer’den zikr olunan hançeri iki yüz kırk bin akçe[ye] iştirâ eylemiş idim, lâkin akçesin sancağıma vardıkda vermek üzre iştirâ eyledim dedikde müşârun-ileyh Suhrab Bey’den sâdır olan kelâm alâ vukū‘ihî merkūm el-Hâc Cafer talebiyle ketb olundu. Tahrîren fî 27 Ramazan sene 1002. Şuhûdü’l-hâl: Es-Sâbikūn.