Bab Mahkemesi 54 Numaralı Sicil (H. 1102 / M. 1691) cilt: 20, sayfa: 165 Hüküm no: 169 Orijinal metin no: [27b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Palaşe bt. Mihayil’de alacağı olduğunu iddia eden Lefter’e ispat için süre verilmesi Havâss-ı Aliyye kazâsına tâbi‘ Hasköy’de Pîrî Paşa mahallesinde sâkin Lefter v. Yanko nâm zimmî meclis-i şer‘-i şerîf-i enverde, işbu bâ‘isetü’l-vesîka Palaşe bt. Mihayil nâm nasrâniye mahzarında üzerine da‘vâ ve takrîr-i kelâm [edip], mezbûre Palaşe târih-i kitâbdan dokuz sene mukaddem Babam Yanko v. Yorko? kendinin mahalle-i mezbûrda vâki‘ ekmekçi fırınında müste’cir olmağla, zevci Anastas zimmî ile ma‘an silk-i mülklerinde münselik on sekiz re’s Bârgiri safka-i vâhide ile babam Yanko’ya kırk bin akçeye bey‘ ve teslîm, babam mezbûr dahi iştirâ ve tesellüm ve teslîm-i mesfûr eyledikden sonra babam mezbûr Yanko âhar diyâra gaybet edip, mârru’z-zikr Bârgirleri merkūme Palaşe yedinde kalıp ve babam mezbûr Yanko zikr olunan Bârgirleri kable’l-kabz diyâr-ı âharda hâlik olup verâseti, bana münhasıra olmağın, hâlâ merkūme Palaşe’ye suâl olunup mûceb-i şer‘îsi icrâ olunmak matlûbumdur dedikde, gıbbe’s-suâl ve akībe’l-inkâr mezkûr Lefter’den müdde‘âsına beyyine taleb olundukda ityân-ı beyyine için istimhâl etmeğin, mehl-i şer‘î birle imhâl olunup, işbu vesîka bi’t-taleb ketb olundu. Fi’l-yevmi’s-sâlis min Cumâdelâhire sene 1102. Şuhûdü’l-hâl: Mustafa Çavuş el-mübâşir, İbrahim Çelebi b. Ahmed, diğer İbrahim Çelebi b. Mehmed, Mustafa b. Şaban.