Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 166 Hüküm no: 162 Orijinal metin no: [38a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çavuş’un vekilinden aldığı parayı kendisine getiren İbrahim b. Abdullah’ta kalan alacağını tahsili Mahmiye-i Kostantıniyye mahallâtından Çavuş Şîrmerd mahallesinde sâkin fahrü’l-akrân Mehmed Çavuş b. Mustafa meclis-i şer‘-i şerîfe İbrahim b. Abdullah nâm acemi oğlanın ihzâr ve mahzarında takrîr-i kelâm edip vilâyet-i Boğdan’da vâki‘ kendi mülküm olan asel bahâsından anda vekîlim olan el-Hâc Pervâne b. Abdullah bundan akdem mezbûr İbrahim ile bana yüz on beş bin akçe irsâl edip lâkin mezbûr İbrahim hâlâ meblağ-ı mezkûru bana teslîmden imtinâ‘ eder, taleb ederin suâl olunsun dedikde gıbbe’s-suâl mezbûr İbrahim cevâb verip vekîl-i merkūm el-Hâc Pervâne müdde‘î-i mezkûr Mehmed Çavuş’a teslîm eyle deyû benim ile irsâl eylediği meblağ kırk iki bin akçe idi, meblağ-ı mezkûrun sekiz bin akçesin alıp ben harclanıp otuz dört bin akçesin Osman nâm kimesne yedinde emânet vaz‘ eylemiş idim, andan zâyi‘ olmuş deyû merkūm İbrahim zikr olunan yüz on beş bin akçenin kırk iki bin akçesin vekîl-i mesfûr el-Hâc Pervâne yedinden mezkûr Mehmed Çavuş’a îsâl için ahz u kabz eylediğini tav‘an ikrâr ve i‘tirâf edip bâkīsin inkâr eyledikde mezbûr İbrahim’in i‘tirâf eylediği kırk iki bin akçeyi müdde‘î-i mezbûr Mehmed Çavuş’a alıver deyû Ahmed b. Abdullah nâm muhzıra cânib-i şer‘den tenbîh olunup mâ hüve’l-vâki‘ kayd olundu. Tahrîren fî 25 min Şevvâl sene 1002. Şuhûdü’l-hâl: Ahmed b. Abdullah, Halil b. Mustafa, Hasan Ağa muhzırbaşı, Abdülganî b. Nezir, Ahmed b. Abdullah el-muhzır, Hasan b. Abdullah, Mehmed b. Bahşi el-mü’ezzin, Murad el-mü’ezzin, Yahya b. Receb el-imâm, Süleyman Çavuş b. Mustafa, Receb Bey b. Cafer.