Bab Mahkemesi 54 Numaralı Sicil (H. 1102 / M. 1691) cilt: 20, sayfa: 166 Hüküm no: 171 Orijinal metin no: [27b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçeri Abdullah b. Mehmed Ağa’nın kendisini yaralayan Yeniçeri Hasan Beşe b. Mehmed ile sulh olması Dergâh-ı âlî -dâme merci‘an li’l-e‘âlî- yeniçerilerinin yirmi beşinci cemâ‘atine mahsûs oda yoldaşlarından Abdullah nâm kimesnenin babası ve tarafından zikr-i âtî husûsu ikrâra vekîl olduğu el-Hâc İbrahim Beşe b. Mehmed ve Mehmed Beşe b. Ali şehâdetleriyle şer‘an sâbit olan el-Hâc Mehmed Ağa b. Hasan meclis-i şer‘-i şerîf-i enverde, yine Dergâh-ı âlî yeniçerilerinin beşinci bölük yoldaşlarından işbu bâ‘isü’l-kitâb Hasan Beşe b. Mehmed mahzarında ikrâr-ı tâm ve takrîr-i kelâm edip, merkūm Mehmed Beşe oğlum müvekkil-i mezbûru târih-i kitâbdan on sekiz gün mukaddem sağ yüzünün üzerinden bıçak ile darb ve mecrûh etmekle, mûceb-i şer‘îsini mezbûr Hasan Beşe’den taleb ve da‘vâ eylediğinde, beynlerinde nizâ‘-ı küllî vukū‘undan sonra muslihûn tavassut edip, da‘vâ-yı mezkûresinden oğlum müvekkil-i mezbûru üç guruş üzerine sulh eylediklerinde, oğlum mezbûr dahi sulh-ı mezbûru kabûl ve bedel-i sulh olan meblağ-ı mezbûr üç guruşu mezbûr Hasan Beşe yedinden tamâmen ahz u kabz eylediğinden sonra husûs-ı mezbûre ve mâ yuhdesü minhumâ müte‘allika âmme-i da‘vâdan mezbûr Hasan Beşe’nin zimmetini ibrâ-i âmm-ı râfi‘ü’l-hisâm ile ibrâ ve iskāt eyledi dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min Cumâdelâhire sene 1102. Şuhûdü’l-hâl: İbrahim Beşe b. Mehmed, el-Hâc Ahmed, İbrahim Beşe, Mehmed Çavuş, Kara Müezzin Abdülbâki.