Bab Mahkemesi 54 Numaralı Sicil (H. 1102 / M. 1691) cilt: 20, sayfa: 167 Hüküm no: 172 Orijinal metin no: [27b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Beşe b. Hacı Mustafa’nın emânet eşya davasının reddi Mahmiye-i İstanbul’da Küçükkaraman’da sâkin Mahmud Beşe b. el-Hâc Mustafa nâm kimesne meclis-i şer‘-i şerîf-i enverde, bâ‘isü hâze’l-kitâb Nasuh Beşe b. Yusuf nâm kimesne mahzarında üzerine da‘vâ ve takrîr-i kelâm edip, mukaddemâ ben âhar diyâra gider olduğumda yüz on akçe ve iki buçuk guruş kıymetli bir hançer ve üç guruş kıymetli bir sîm dizge ve bir guruş kıymetli otuz makrama ve dörder guruş kıymetli dört gömlek ve birer guruş kıymetli iki don ve yarımşar guruş kıymetli beş uçkurumu mezbûr Nasuh Beşe’ye bi tarîki’l-emâne teslîm, ol dahi istîdâ‘ ve kabz eylediğinden sonra mezbûr doksan guruşunu bana teslîm, ben dahi ahz u kabz edip mâ‘adâ akçe teslîminden imtinâ‘ eder, suâl olunup mûcebince icrâ olunmak matlûbumdur dedikde, gıbbe’s-suâl mezbûr Nasuh Beşe cevâbında, fi’l-hakīka meblağ-ı mezbûr yüz on guruş ile eşyâ-i mezkûreyi istîdâ‘ ve kabzını ikrâr, lâkin eşyâ-i mezkûrenin mecmû‘unu bi a‘yânihâ kendiye teslîm etmişimdir deyicek, mezbûr Nasuh Beşe’ye husûs-ı mezbûr emîni olup yemîni ile musaddak olmağla, eşyâ-i mezkûreyi bi a‘yânihâ müdde‘î-i mezbûra teslîm eylediğine bi’t-taleb yemîn teklîf olundukda, ol dahi hasbe’l-mes’ûl half bi’llahi’l-aliyyi’l-a‘lâ etmeğin, mûcebiyle mezbûr Mahmud Beşe bî-vech mu‘ârazadan men‘ olunup, mâ vaka‘a bi’t-taleb ketb olundu. Fi’l-yevmi’s-sâlis min Cumâdelâhire sene 1102. Şuhûdü’l-hâl: Mehmed Efendi b. Mustafa, İbrahim Çelebi b. Ahmed, İbrahim Çelebi b. Mehmed, Mustafa [b.] Şaban.