Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 171 Hüküm no: 168 Orijinal metin no: [39b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice Hatun bt. Cevri’yi nikâhladığını iddia eden İbrahim b. Sinan’ın kötü halle meşhur olduğunun tesbiti Mahmiye-i İstanbul’da merhûm Mesih Paşa mahallesinde sâkin İbrahim b. Sinan nâm kimesne meclis-i şer‘-i şerîfe mahrûsa-i Edirne sâkinlerinden işbu râfi‘ü’l-kitâb Hatice Hâtun bt. Cevri Efendi nâm hâtunu ihzâr ve mahzarında takrîr-i kelâm edip mezbûre Hatice Hâtun’u bundan akdem rızâsıyla ve on beş bin akçe mehr-i müeccel ile nikâhlanıb taht-ı nikâhımda iken hâlâ imtinâ‘ eder suâl olunsun dedikde gıbbe’s-suâl mezbûre Hatice Hâtun inkâr edip istişhâd olundukda Muslihiddin nâm imâm rızâsıyla ben nikâh eyledim deyû şehâdet için hâzır oldukda mezkûre Hatice’ye şehâdet etmeyip yanındaki âhar hâtun buna bi’z-zât nikâh etdim deyû şehâdet edip ve Himmet b. Musa nâm şahıs nikâha şehâdet edip lâkin gördün mü deyû suâl olundukda görmedim, kapı ardından bir âvâz işittim deyû şehâdet edip müdde‘î-i mezbûrun hasb-i hâli ol mahalde hâzır olan kuzâtdan istihbâr olundukda Edirne’den fahrü’l-kuzât Çukacızâde ve gayriler müdde‘î-i mezbûrun şer‘ ve fesâd ile ma‘rûf ve meşhûr idiğini ihbâr edip ve mezbûrun dahi âhar şâhidi olmayıp [40a] ve şehâdet edenlerin dahi ihtilâl ve fesâdı zâhir olmağın mâ vaka‘a bi’t-taleb ketb olundu. Tahrîren fî selhi Şevvâl sene 1002. Şuhûdü’l-hâl: Mevlânâ Şem‘ullah b. Şaban el-kadı, Mevlânâ Ahmed Efendi eş-şehîr bi Şeyhzâde el-kadı, Mevlânâ İbrahim b. Adem Pîrî el-kadı, Cafer Çavuş b. Abdullah, Süleyman b. Mahmud, Mustafa b. Hamza.