Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 172 Hüküm no: 170 Orijinal metin no: [40a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Es-Seyyid Şaban b. es-Seyyid Abdülaziz’in hâlâ Yeniçeri ağası Mehmed’in tasarrufundaki mülk evi vaktiyle Eflak voyvodası Mihal’e sattığının tesbiti Mefharü’s-sâdâti’l-kirâm Mevlânâ es-Seyyid Şaban b. es-Seyyid Abdülaziz meclis-i şer‘-i refî‘ü’l-bünyâna hâzır olup kıdvetü ashâbi’l-izzi ve’l-ikbâl umdetü erbâbi’l-mecdi ve’l-iclâl hâlâ Yeniçeri Ağası olan Mehmed Ağa b. Hüseyin tarafından husûs-ı âti’z-zikre Süleyman Subaşı b. Davud ve Ali Subaşı b. Abdullah şehâdetleriyle vekâleti sâbite olan fahrü’l-akrân Süleyman Bey b. Abdurrahman ez-zevvâku’s-sultânî [mahzarında] takrîr-i kelâm edip mahmiye-i İstanbul’da Edirnekapısı kurbunda Hatice Sultan mahallesinde vâki‘ buyût-ı müte‘addide ve hamam ve müte‘addid bağ ve bağçeleri müştemil inde’l-ahâlî ma‘lûmetü’l-hudûd olup hâlâ müşârun-ileyh Mehmed Ağa’nın mülkü ve hâlâ tasarrufunda olan menzil sâbıkda benim mülk-i mahzım olup lâkin ba‘dehû menzil-i mezbûru vilâyet-i Eflak voyvodası olan Mihal Voyvoda’ya yirmi dokuz kere yüz bin nakd-i râyic fi’l-vakt fıddî-i Osmânî akçeye bey‘-i bâtt-ı sahîh-i şer‘î ile bey‘ edip meblağ-ı mezbûru mezkûr yedinden bi’t-tamâm kabz edip hâlâ menzil-i mezkûra müte‘allik kat‘an alâkası kalmamışdır dedikde, mezkûr es-Seyyid Şaban’ın kelâm-ı meşrûhunu vekîl-i mesfûr vicâhen tasdîk ve şifâhen tahkīk edip mâ vaka‘a bi’t-taleb ketb olundu. Tahrîren fî gurreti Zilka‘de sene 1002. Şuhûdü’l-hâl: Fahru’l-akrân Ali Bey b. Süheyl el-mütevellî, Ali Bey b. Hüseyin es-silâhî, Hamza Bey b. Abdullah el-a‘ser, Osman Bey b. Abdullah el-bevvâbü’s-sultânî.