Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 172 Hüküm no: 171 Orijinal metin no: [40a-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaçak kölenin sahibine teslim edildiği Dârü’s-saltanati’s-seniyye mahmiye-i Kostantıniyye’de vâki‘ Muhtesib Karagöz mescidinde imâm olan mefharü’s-sulehâ Mevlâna İsmail b. Mehmed ve fahrü’l-a‘yân Kasım Ağa b. Abdullah nâm kimesneler meclis-i şer‘-i şerîfde hâzırân olup, mahmiye-i mezbûre mahallâtından Tahtaminâre mahallesi sükkânından Hüsrev Çavuş b. Abdullah nâm zilyed-i münkir mahzarında, mahmiye-i Galata kazâsı tevâbi‘inden Kasımpaşa kasabası mahallâtından Surûrî mahallesinde sâkin olan râfi‘-i hâzihi’s-sahîfe-i sahîha Hasan Reis b. Mehmed’den sâdır olan da‘vâ-i sahîha-i şer‘iyyede gıbbe’l-istişhâdi’ş-şer‘î şöyle şehâdet ettiler ki, elân müdde‘â aleyh-i mezbûr yedinde bulunan Rûsiyyetü’l-asl, uzun boylu, açık kaşlı, elâ gözlü, yüzünde çiçek bozuğu olan Canfedâ bt. Abdullah nâm câriye, müdde‘î-i mezkûr Hasan Reis’in mülk-i mahzı ve hakk-ı hâlis-i sırfıdır. Müdde‘î-i mezkûra câriye-i merkūmeyi satmadığına, hibe etmediğine, bi vechin mine’l-vücûh mülkiyyetinden ihrâc etmediğine dâir yemîn-i billâhi te‘âlâ verilmesinden sonra şehâdetleri ba‘de ri‘âyet-i şerâiti’l-kabûl inde’ş-şer‘ makbûl ve mûteber olmağın mûcibince hükmedildi. Cerâ zâlike ve hurrire fi’l-yevmi’t-tâsi‘ ve’l-ışrîn min Şevvâl sene 1002. Şuhûdü’l-hâl: İdris Kethüdâ? b. Abdullah …?, Mehmed b. Ömer el-müezzin, Hüsam b. Durmuş, Perviz b. Abdullah, Hasan b. Abdullah