Bab Mahkemesi 54 Numaralı Sicil (H. 1102 / M. 1691) cilt: 20, sayfa: 167 Hüküm no: 173 Orijinal metin no: [28a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Anca bt. Aleksan’ın Mehmed b. Abdullah’tan muhâlaa yoluyla boşanması Mahmiye-i İstanbul’da Abdi Subaşı mahallesi sâkinelerinden olup zâtı ma‘rifet-i şer‘iyye ile ârifân Ali Çelebi b. Abdullah ve Kanbur Ahmed Çelebi nâm kimesneler ta‘rîfleriyle mu‘arrefe olan Anca bt. Aleksan nâm nasrâniye meclis-i şer‘-i şerîfde, zevc-i dâhili Mehmed b. Abdullah nâm mühtedî mahzarında ikrâr-ı tâm ve takrîr-i kelâm edip, zevcem merkūm Mehmed Çelebi zimmetinde mehr-i müeccelim olmak üzre beynimizde kıymeti [mütekarrir ve] ma‘kūdun aleyh olan bir sîm yüzük ve iddet-i mu‘ayyenem üzerlerine ve me’ûnet-i süknâm dahi kendi üzerime olmak üzre zevcim merkūm Mehmed ile muhâla‘a edip, ol dahi ber vech-i muharrer muhâla‘a-i mezbûreyi kabûl ettiğinden sonra hukūk-ı zevciyyete ve sâir târih-i kitâba gelince beynimizde cereyân eden kalîl ü kesîr hukūka müte‘allika âmme-i da‘vâdan her birimiz âharın zimmetini ibrâ ve iskāt eyledik dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ min Cumâdelâhire li sene isneteyn ve mi’e ve elf. Şuhûdü’l-hâl: El-Hâc Şaban b. Ebûbekir, Süleyman Çelebi b. Abdullah, el-Hâc Mehmed b. Halil, Mehmed Çelebi b. Veli, İbrahim Çelebi b. Ahmed gayruhüm mine’l-hâzırîn.