Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 178 Hüküm no: 181 Orijinal metin no: [42a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Abdullah’ın Ayşe Hatun Vakfı’na ait bir miktar yeri haksız şekilde tahta duvarla çevirdiği Mahmiye-i İstanbul’da vâki‘ merhûme Ayşe Hâtun Vakfı’na hâlâ mütevellî olan işbu râfi‘ü’l-kitâb es-Seyyid Ramazan b. Halil nâm kimesne meclis-i şer‘-i şerîfe Hasan b. Abdullah nâm yeniçeriyi ihzâr ve mahzarında takrîr-i kelâm edip mütevellîsi olduğum vakf-ı mezbûrun arzından mesfûr Hasan kendi menziline muttasıl olan tarafından tûlen on bir zirâ‘ ve arzen on sekiz parmak ve bir tarafdan dahi geri tûlen on zirâ‘ ve arzen on dört parmak yerini tahta duvar içine alıp kendi menzili muhavvatasına ilhâk edip vakfa gadr etmişdir. Men‘ olunmasın taleb ederin deyû kavline mutâbık ve hakīkat-i hâle vâkıf Müslimînin şehâdetlerin müştemil keşif hücceti ibrâz edip suâl olundukda mezbûr Hasan inkâr etmeğin, ahâlî-i mahalleden Budak b. Üveys ve el-Hâc Murad b. Abdullah nâm kimesneler ve sâirleri zikr olunan arz vakf-ı mezbûrdan olup merkūm Hasan gasb ve te‘addî etdiğine şehâdet edip mezkûrûnun şehâdetleri ba‘de’t-ta‘dîl hayyiz-i kabûlde vâkı‘a olmağın vaz‘-ı aslî üzre zikr olunan tahta duvarı yerine alıp gitmek için mezbûr Hasan’a cânib-i şer‘den tenbîh olunup mâ vaka‘a bi’t-taleb ketb olundu. Tahrîren fî 6 min Zilka‘de sene 1002. Şuhûdü’l-hâl: Mustafa b. Şükrullah el-mü’ezzin, Murad b. Veli, Süleyman b. Mahmud, Turâbî b. Hasan ve gayruhüm.