Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 179 Hüküm no: 182 Orijinal metin no: [42a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey’in vârisleri olan kızı Ayşe ve anası Râbia bt. Abdullah’ın Beytülmâl emini Mehmed b. Mustafa’da olan miras malı talepleri Oldur ki, bundan akdem mahrûsa-i Tebriz’de Topçular bölükbaşısı iken vefât eden merhûm Mehmed Bey’in sulbiye kızı Ayşe ve anası Râbia bt. Abdullah nâm hâtunlar meclis-i şer‘-i şerîfe Dergâh-ı âlî çavuşlarından fahrü’l-akrân Abdi Çavuş mübâşeretiyle mahrûsa-i mezbûrede ol hîn topçular beytülmâlı emîni olan Mehmed b. Mustafa nâm kimesneyi ihzâr ve mahzarında takrîr-i kelâm edip müteveffâ-yı mezbûrun mahrûsa-i mezkûrede vâki‘ olup bize âid olan muhallefâtın merkūm Mehmed Bey emâneti hasebiyle kabz eylemişdir. Hâlâ taleb ederiz suâl olunsun dediklerinde gıbbe’s-suâl mezbûr Mehmed Bey tav‘an ikrâr ve i‘tirâf edip fi’l-vâki‘ müteveffâ-yı mezbûrun yanında mevcûd olan muhallefâtdan kırk altı bin akçe esbâb bahâsından ve sekiz bin akçe nukūddan cem‘an elli dört bin akçe makbûzum olmuşdur dedikde emîn-i mezkûrun ikrâr-ı tav‘îsin mezbûretân Ayşe ve Râbia talebleriyle ketb olundu. [Tahrîren] fî evâili Zilka‘de sene isneteyn ve elf. Şuhûdü’l-hâl: İbrahim Çavuş [b.] Mustafa, Süleyman b. Mahmud, Receb Bey b. İsmail, Mustafa b. Abdullah ser-bölük ve gayruhüm.