Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 179 Hüküm no: 183 Orijinal metin no: [42a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kefe kadısı Mehmed Efendi’nin, Yusuf Reis b. Abdurrahman ile Matbah-ı âmireye gönderdiği yağ tulumlarından bir kısmının gemisi fırtınaya yakalanması sebebiyle zâyi olduğu Bundan akdem mahrûsa-i Kefe kadısı olan Mevlânâ Mehmed Efendi tarafından husûs-ı âti’z-zikre vekîl-i şer‘î olan işbu râfi‘ü’l-kitâb Bayram b. İskender nâm kimesne meclis-i şer‘-i şerîfe Yusuf Reis b. Abdurrahman nâm mellâhı ihzâr ve mahzarında takrîr-i kelâm edip bundan akdem müvekkilim merkūm Mehmed Efendi Matbah-ı âmireye yağ irsâline me’mûr oldukda on aded tulum içinde altmış yedi kantar yağ alıp, merkūm Yusuf Reis’le Matbah-ı âmireye irsâl eylemiş idi. Hâlâ zikr olunan yağın cümlesi matbaha vâsıl olmamıştır, suâl olunsun dedikde, gıbbe’s-suâl mezkûr Yusuf Reis cevâb verip, fi’l-vâki‘ zikr olunan mikdâr yağı Matbah-ı âmireye teslîm için mezkûr Mehmed Efendi yedinden kabz eylemiş idim. Lâkin sefîne ile gelirken Şile nâm mevzi‘ kurbunda fırtına olup sefînem helâk olup zikr olunan yağ cemî‘an deryâya düşüp, ba‘dehû otuz iki kantarın geri deryâdan ihrâc edip zikr olunan yağı kabza me’mûr olan Abdülkerim nâm kapıcıya teslîm edip bâkīsi deryâdan çıkmayıp zâyi‘ olmuşdur dedikde mezbûr Abdülkerim bi’l-muvâcehe zikr olunan otuz iki kantar yağı me’mûr olduğu üzre Matbah-ı âmireye teslîm için merkūm Yusuf Reis yedinden kabz eylediğine mu‘terif olup, ba‘de’l-istihlâf merkūm Yusuf Reis bi vechin mine’l-vücûh te‘addî etmediğine tahlîf olunup yemîn billâh etdikde mâ vaka‘a kayd olundu. Tahrîren fi’l-yevmi’s-sâdis min Zilka‘deti’l-mübâreke sene isneteyn ve elf. Şuhûdü’l-hâl: Hacı Mustafa b. Hüseyin, Hacı Ali b. Abdullah, Hacı Hasan b. Maksud, Hacı Mustafa b. Himmet.