Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 183 Hüküm no: 190 Orijinal metin no: [43b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Salamon adlı Yahudi tacirin Muharrem Çelebi b. Hüseyin’e olan borcunun bir kısmının vârisi David v. Avraham tarafından ödendiği Mahmiye-i İstanbul Yahudilerinden Kireoğlu dimekle ma‘rûf olup bundan akdem helâk olan Salamon nâm Yahudi’nin li-eb karındaşı ve vâris-i vâhidi olan David v. Avraham nâm Yahudi tarafından husûs-ı âti’z-zikre İbrahim Bey b. Abdullah el-bevvâb ve Rıdvan Bey b. Abdullah nâm kimesneler şehâdetleriyle vekâleti sâbite olan Yasef v. Avraham nâm Yahudi meclis-i şer‘-i şerîfe hâzır olup işbu râfi‘ü’l-kitâb Mevlânâ Muharrem Çelebi b. Hüseyin mahzarında takrîr-i kelâm edip hâlik-i mezbûr hayâtda iken merkūm Muharrem Çelebi ile nice mu‘âmele-i şer‘iyyesi olup ba‘de küllî hesâb hâlik-i mezbûr zimmetinde sâlifü’z-zikr Muharrem Çelebi’nin iki yüz on bin akçe hakkı zuhûr etdikden sonra mezbûr Salamon helâk olup meblağ-ı merkūm uhdesinde bâkī kalmış idi. Hâlâ müvekkilim mezkûr David hâlik-i mezkûrun muhallefâtından merkūm Muharrem Çelebi’ye meblağ-ı mezkûrun yedi bin akçesin teslîm edip hâlik-i mezbûr uhdesinde meblağ-ı mesfûrdan iki yüz üç bin akçe bâkī kalmışdır dedikde sâlifü’z-zikr Muharrem Çelebi dahi zikr olunan yedi bin akçeyi vâris-i mezbûr David yedinden kabz ve tesellümünü tav‘an i‘tirâf ve vekîl-i merkūmu kelâm-ı meşrûhunda vicâhen ve şifâhen tasdîk ve tahkīk edip mâ hüve’l-vâki‘ bi’t-taleb ketb olundu. Tahrîren fî evâsıtı Zilka‘de sene 1002. Şuhûdü’l-hâl: Mustafa Çavuş b. Hamza, Mustafa Çavuş b. Ali, Ömer Çavuş b. Hüseyin, İbrahim Bey b. Abdullah.