Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 186 Hüküm no: 195 Orijinal metin no: [44a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Fazlullah’ın kiralayıp tamir ettirdiği evin masrafını Hoca Pîrî Vakfı’ndan tahsil ettiği ve evi iadesi Mahmiye-i Kostantıniyye mahallâtından Samanviran mahallesinde sâkin Ali Çelebi b. Fazlullah nâm kimesne meclis-i şer‘-i şerîfe hâzır olup mahalle-i mezkûrede vâki‘ merhûm Hoca Pîrî Vakfı’na meşrûtiyyet üzre mütevellîye olan sâhibetü’l-kitâb Fâtıma bt. Mahmud nâm Hâtun’un husûs-ı âti’z-zikre vekîli olan diğer Fâtıma bt. Şaban mahzarında takrîr-i kelâm edip bundan akdem vakf-ı mezbûrdan mahalle-i mezkûrede vâki‘ lede’l-ahâlî ma‘lûmetü’l-hudûd olan menzili mütevellîye-i merkūmeden on yıla istîcâr edip ve menzil-i mezbûru ta‘mîr ve termîm edip ziyâde binâ ihdâs için kendi mâlımdan altmış iki bin akçe harc u sarf eylediğim isbât eylemiş idim. Hâlâ meblağ-ı merkūm altmış iki bin akçeyi mütevellîye-i mesfûre Fâtıma yedinden bi’t-tamâm alıp kabz edip menzil-i mezkûru mütevellîye-i mesfûreye teslîm eyledim dedikde mezbûr Ali Çelebi’nin kelâm-ı meşrûhunu vekîl-i merkūme vicâhen tasdîk ve şifâhen tahkīk edip mâ hüve’l-vâki‘ bi’t-taleb ketb olundu. Tahrîren fî evâhiri Zilka‘de sene 1002. Şuhûdü’l-hâl: Hasan b. Abdullah, Hasan Çavuş el-mübâşir, Ahmed b. Abdullah, Himmet b. Murad, Ömer b. Maden el-imâm, Süleyman b. Mahmud el-imâm, Mehmed b. Ali el-mü’ezzin, Receb b. Pîrî, Memi b. Abdullah, diğer Hasan b. Abdullah.