Bab Mahkemesi 54 Numaralı Sicil (H. 1102 / M. 1691) cilt: 20, sayfa: 168 Hüküm no: 175 Orijinal metin no: [28a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. Mehmed’in borcunun varislerince ödenmesi Mahmiye-i İstanbul’da Molla Şeref mahallesinde sâkin iken bundan akdem vefât eden Ahmed Ağa b. Mehmed b. Ali’nin verâseti, zevce-i metrûkesi Emine bt. Abdullah ve vâlidesi Meryem bt. Abdullah nâm hâtun ile sagīr oğulları Ali ve Hamza’ya münhasıra olduğu şer‘an zâhir ve müte‘ayyin oldukdan sonra sagīrân-ı mezbûrânın tesviye-i umûrlarına kıbel-i şer‘den mansûb vasîleri olmağla vesâyeten ve mezbûretân Emine ve Meryem nâm hâtunlar tarafından husûs-ı âti’l-beyâna vekîl-i şer‘îsi olmağla vekâleten el-Hâc Mustafa Ağa b. İbrahim meclis-i şer‘-i şerîf-i enver ve mahfil-i dîn-i münîf-i ezherde, Mehmed Beşe b. Abdullah mahzarında bi’l-vesâye ve bi’l-vekâle üzerine da‘vâ ve takrîr-i kelâm edip mezbûr Mehmed Beşe müteveffâ-yı mezbûr Ahmed Ağa’ya hayâtında bir yeniçeri esâmesi alıvereyim deyu bi gayri hakkın müteveffâ-yı mezbûrun yedinden altmış beş guruşunu ahz u kabz edip, kable’l-ahz fevt olup mezbûrun zimmetinde bâkī kalmağın, mezbûr Mehmed Beşe’ye suâl olunup meblağ-ı mezbûru bi’l-vesâye ve bi’l-vekâle bana teslîme tenbîh olunmak matlûbumdur dedikde, gıbbe’s-suâl mezbûr Mehmed Beşe cevâbında, fi’l-hakīka müteveffâ-yı mezbûr Ahmed Ağa’ya ber vech-i muharrer hayâtında bir yeniçeri esâmesi alıverilmek için mezbûrun yedinden altmış beş guruş ahz u kabz ettiğin ikrâr ve i‘tirâf etmeğin ,alâ mûcebi i‘tirâfihî meblağ-ı mezbûr altmış beş guruş müdde‘î-i mezbûr el-Hâc Mustafa Ağa’ya def‘ ve teslîme mezbûr Mehmed Beşe’ye tenbîh birle, mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min Cumâdelâhire li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, İsmail b. Mustafa, diğer İbrahim b. Mehmed, Ali Çelebi b. Bâli ve gayruhüm.