Bab Mahkemesi 54 Numaralı Sicil (H. 1102 / M. 1691) cilt: 20, sayfa: 169 Hüküm no: 176 Orijinal metin no: [28a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Abdullah’ın terekesinden kocası Ahmed Beşe b. Şaban’ın hissesinin verilmesi Mahmiye-i İstanbul’da Timurhan mahallesi sâkinelerinden iken bundan akdem fevt olan Ayşe bt. Abdullah nâm hâtunun zevci olduğunu iddi‘â eden Ahmed Beşe b. Şaban nâm kimesne meclis-i şer‘-i şerîf-i enver ve mahfil-i dîn-i münîf-i ezherde, müteveffât-ı mezbûrenin zevci olmak zu‘muyla rub‘-ı terekesine vaz‘-ı yedi mütehakkik olan Mustafa Beşe b. Abdülkerim mahzarında üzerine da‘vâ ve takrîr-i kelâm edip, müteveffât-ı mezkûre Ayşe târih-i kitâbdan sekiz sene mukaddem altı yüz akçe mehr-i müeccel tesmiyesiyle şuhûd mahzarında nefsini bana tezvîc, ben dahi ber vech-i muharrer tezevvüc ve kabûl eyledikden sonra taht-ı nikâhımda iken mezbûre Ayşe fevt olup, verâseti bana ve benim firâşımdan hâsılân ve mezbûreden mütevellidân oğlum Mehmed ve kızım Hatice’ye ve âhar kızı Fâtıma’ya münhasıra iken mezbûr Mustafa Beşe ber vech-i muharrer rub‘ hisseme vaz‘-ı yed eder, suâl olunup rub‘ hisse-i şer‘iyyemi bana teslîme tenbîh olunmak matlûbumdur dedikde, gıbbe’s-suâl mezbûr Mustafa Beşe cevâbında, müteveffât-ı mezbûre Ayşe târih-i kitâbdan beş sene mukaddem benim zevcim yokdur deyu nefsini dokuz yüz akçe mehr-i müeccel tesmiyesiyle lede’ş-şuhûd bana inkâh ve tezvîc ve ben dahi tezevvüc ve kabûl ve zevce-i menkûha olmak üzre rub‘ hisseye vaz‘-ı yed ederim, müteveffât-ı mesfûre Ayşe müdde‘î-i mezbûre benden mukaddem altı yüz akçe mehr-i müeccel tesmiyesiyle nefsini tezvîc, müdde‘î-i mezbûr dahi tezevvüc ve kabûl edip, zevce-i menkûhası olduğu ma‘lûmum değildir dedikde, müdde‘î-i mezbûrdan müdde‘âsına beyyine taleb olundukda, mahalle-i mezbûre sükkânından müteveffât-ı mezbûrenin hayâtında zâtını ma‘rifet-i şer‘iyye ile [28b] ârifân Yusuf Çelebi b. Abdurrahman ve Şahin Beşe b. Abdullah nâm kimesne li ecli’ş-şehâde meclis-i şer‘a hâzırân olup isre’l-istişhâd, fi’l-hakīka müteveffât-ı mezbûre Ayşe târih-i kitâbdan sekiz sene mukaddem altı yüz akçe mehr-i müeccel tesmiyesiyle şuhûd mahzarında nefsini işbu müdde‘î-i mezbûr Ahmed Beşe’ye inkâh ve tezvîc ve ol dahi tezevvüc ve kabûl eyledikden sonra taht-ı nikâhında iken fevt olmuşdur. Biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye eylediklerinde, gıbbe’t-ta‘dîl ve’t-tezkiye şehâdetleri makbûle olmağın, mûcebiyle ba‘de’l-hükm ve’t-tenbîh mâ vaka‘a bi’t-taleb ketb olundu. Fi’l-yevmi’t-tâsi‘ min Cumâdelâhire sene 1102 Şuhûdü’l-hâl: İbrahim Çelebi [b.] Ahmed, Mehmed Çelebi b. İbrahim, Hüseyin Çelebi b. Mustafa, İsmail b. Mehmed.