Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 199 Hüküm no: 208 Orijinal metin no: [48b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aydın Bey b. Abdullah’ın muhallefâtından Beytülmâle intikal eden evin müzâyede ile Mehmed Ağa b. Ali’ye satıldığı Bundan akdem sâkin olduğu Edirne kazâsı tevâbi‘inden Ulûfeciler karyesinde vefât eden on sekizinci yayalar bölüğünden merhûm râcil Aydın Bey b. Abdullah’ın muhallefâtına vâzı‘-ı yed olan, Atebe-i aliyye ve südde-i seniyyede vâki‘ râcilin zümresine mahsûs Beytülmâlin emîni mefharü’l-a‘yân Mustafa Subaşı b. Osman meclis-i şer‘-i şerîfde hâzır olup, âtiyyü’z-zikr menzili, fahrü’l-a‘yân Mehmed Ağa b. Ali kıbelinden eşyâ-i âtiyyü’z-zikri iştirâya vekâleti Mehmed Bey b. Ömer el-cündî ve hayyât-ı sultânî Rıdvan b. Abdullah’ın şehâdetleri ile sâbit olan fahrü’l-akrân Mehmed Çavuş b. el-Hâc Mustafa’ya emânet-i mahkiyyesi hasebiyle bey‘-i bâtt-ı sahîh ile bey‘ ettiğini ikrâr ve i‘tirâf etti. Vekîl-i mezbûr da vekâlet-i mahkiyyesi hasebiyle, müteveffâ-i mesfûrdan beytülmâle intikāl eden, Edirne tevâbi‘inden Kapenaz nâm karyede vâki‘, tahtânî üç beyti, fırını, önlerinde bahçe bulunan ahır ve samanlığı ve avluyu hâvî olan, bir taraftan Hemdem Ağa b. Abdullah mülkü, diğer taraftan Demirci Yani mülkü ve arâzi-i hâliye ile mahdûd bulunan cemî‘-i menzili cümle tevâbi‘ ve levâhıkı ve içinde bulunan on altı re’s sığır ve buzağısı ve beynlerinde ma‘lûm sâir âlât-ı zirâ‘iye ile ve menzil-i mezbûra ilâveten karye-i merkūme sınırında vâki‘, bir taraftan mezbûr Hemdem Ağa bağı, diğer taraftan Dülger Dimitri tarlası, öteki taraftan ( ) nâm sagīr mülkü ile mahdûd bahçesini kâffe-i merâsim ve mürâfıkı ile râyicü’l-vakt otuz bin akçe semen-i mu‘ayyen-i makbûz ile ve îcâb kabûl ve teslîm tesellümü hâvî bey‘-i bâtt-ı sahîh ile iştirâ etti. İşbu mubâya‘a, menzil-i mezbûrun mirâren beyne’t-tâlibîn ve’r-râgıbîn müzâyede olunup semen-i mezbûrla müşterî üzerinde karâr eylemesinden sonra vâki‘ oldu. Vâki‘ ikrâr, müvekkil-i mezbûr tarafından vicâhen ve şifâhen tasdîk edildi. Cerâ zâlike ve hurrire fî 29 min Zilka‘de sene 1002. Şuhûdü’l-hâl: Abdurrahman b. Nasuh el-İmâm, Ali b. İsa el-İmâm, Mustafa b. Osman, Ali b. Mehmed el-hallâc, Mehmed Bey b. Abdullah el-cündî, Kurd b. Abdullah, Hüseyin b. Abdullah, Behrâm Bey b. Abdullah, Mehmed Bey b. Ömer el-cündî, Rıdvan b. Abdullah, Mahmud Bey [b.] Abdullah, Bayezid Subaşı b. Abdullah, Hasan b. Abdullah, Hasan b. Pîrî, Derviş b. Sinan