Bab Mahkemesi 54 Numaralı Sicil (H. 1102 / M. 1691) cilt: 20, sayfa: 170 Hüküm no: 177 Orijinal metin no: [28b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Ağa b. Abdurrahman’ın Simon v. Mardiros’da alacağı olduğu Husûs-ı âti’l-beyânı mahallinde istimâ‘ ve tahrîr için savb-ı şer‘-i şer‘îf-i enverden me’zûnen bi’l-iltimâs Murtaza Efendi b. İshak irsâl olunup, ol dahi mahmiye-i İstanbul’da Çıkrıkçı Kemal mahallesinde Helvacı Mehmed Ağa b. Abdullah nâm kimesnenin ve sâkin olduğu menziline varıp, zeyl-i mastûrda muharrerü’l-esâmi olan müslimîn huzûrunda akd-i meclis-i şer‘-i mübîn eyledikde, mahalle-i mezbûre sükkânından bâ‘isü’l-kitâb Hasan Ağa b. Abdurrahman nâm kimesne meclis-i ma‘kūd-ı merkūmda Simon v. Mardiros nâm zimmî muvâcehesinde üzerine da‘vâ ve takrîr-i kelâm edip, bundan esbak merkūm Simon zimmî yedime verdiği işbu bin yüz bir Saferü’l-hayr ile müverrah ve mührüyle memhûr temessük nâtık olduğu yüz on beş guruş ve Cumâdelâhire gurresiyle müverrah ve kezâlik mührüyle memhûr temessük nâtık olduğu üzre yüz yirmi guruş cem‘an iki yüz otuz beş guruşu merkūm Simon zimmîye bi’d-defa‘ât ikrâz ve def‘ ve teslîm, ol dahi ber vech-i muharrer iktirâz ve ahz u kabz ve mesârifine sarfla istihlâk edip, sarfını huzûrumuzda ikrâr dahi etmişidi. Hâlâ merkūm Simon zimmîye suâl olunup temessükleri mûcebince meblağ-ı mecmû‘-ı mezbûru bana edâ ve teslîme merkūm Simon zimmîye tenbîh olunmak matlûbumdur deyu mazmûnları takrîr-i meşrûhuna muvâfık iki kıt‘a deyn temessükü ibrâz edip, merkūm Simon zimmî muvâcehesinde feth ve kırâ’at ve suâl olundukda, merkūm Simon cevâbında sene-i mezbûrenin Cumâdelâhire’yle müverrah temessükün nâtık olduğu yüz yirmi guruşdan ancak yüz guruş deyni olduğunu ikrâr, ziyâde yirmi guruş ile Saferü’l-hayr ibtidâsıyla müverrah olan temessükün nâtık olduğu yüz on beş deynini inkâr edicek, müdde‘î-i mezbûrdan müdde‘âsına mutâbık beyyine taleb olundukda, temessük-i mezbûr zeylinde mastûrü’l-ism olan mezbûr Helvacı Mehmed Ağa b. Hüseyin b. Mehmed nâm kimesneler meclis-i ma‘kūd-ı mezbûra li ecli’ş-şehâde hâzırân olup isre’l-istişhâd, fi’l-hakīka târih-i mezbûrda merkūm Simon zimmî cihet-i karz-ı şer‘îden yüz on beş guruş müdde‘î-i mezbûr Hasan Ağa’ya zimmetimde vâcibü’l-edâ deynimdir deyu bizim huzûrumuzda ikrâr ve bizi işhâd edip, işbu deyn temessükünü vermişdi. Biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye ettiklerinde, mevlânâ-yı mezbûr mahallinde tahrîr ve ba‘dehû ma‘an irsâl olunan Mehmed Çelebi b. Halil ve Nasuh b. Osman ile meclis-i şer‘a gelip alâ vukū‘ihî her biri inhâ ve takrîr etmeğin, gıbbe’t-ta‘dîl ve’t-tezkiye şehâdetleri makbûle olmağın, mûcebince merkūm Simon kabzını i‘tirâf eylediği yüz guruş ile meblağ-ı mezbûr yüz on beş guruşu müdde‘î-i mezbûra edâ ve teslîme merkūm Simon zimmîye tenbîh olundukdan sonra müdde‘î-i mezbûr Hasan Ağa ziyâde yirmi guruş da‘vâsına âhar beyyine için istimhâl etmekle, mehil-i şer‘î ile imhâl olunmağın, mâ vaka‘a bi’t-taleb ketb olundu. Fi’l-yevmi’s-sâbi‘ min Cumâdelâhire li sene isneteyn ve mi’e ve elf. Şuhûdü’l-hâl: Mustafa b. Halil, İsmail Çelebi b. Ahmed, Murad Bey b. Mehmed, İbrahim Bey b. Abdullah, Mehmed Çelebi b. Halil, Rıdvan Bey b. Osman.