Bab Mahkemesi 54 Numaralı Sicil (H. 1102 / M. 1691) cilt: 20, sayfa: 171 Hüküm no: 178 Orijinal metin no: [28b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Hasan üzerine kızı Hatice için nafaka takdir edilmesi Mahmiye-i İstanbul’da Harâccı Muhyiddin mahallesi sâkinlerinden bâ‘isetü’l-hâze’l-kitâb Ayşe bt. Kadri nâm hâtun meclis-i şer‘-i şerîf-i enverde takrîr-i kelâm ve ta‘bîr ani’l-merâm edip, zevc-i mutallıkım işbu Mustafa b. Hasan nâm kimesnenin firâşından hâsıla ve benden mütevellide sadriye sagīre kızım ve hâlâ bi hakkı’l-hidâne hacr ve terbiyemde olan Hatice nâm sagīrenin nafaka ve kisve ve sâir levâzım-ı mühimmesi için babası mezbûr Mustafa üzerine kıbel-i şer‘den kadr-i ma‘rûf nafaka farz ve takdîr olunmak matlûbumdur dedikde, hâkim-i muvakki‘-i sadr-ı kitâb -tûbâ lehû ve hüsnü me’âb- hazretleri dahi sagīre-i mezbûrenin nafaka ve kisve ve sâir levâzım-ı mühimmesi için târih-i kitâbdan bi’l-muvâcehe beher yevm beşer akçe nafaka farz ve takdîr edip, meblağ-ı mefrûz-ı mezbûru sagīre-i mezbûrenin levâzım-ı mühimmesine harc u sarf ve lede’z-zarûriyye istidâne ve inde’z-zafer babası mezbûr Mustafa üzerine rücû‘a mezbûre Ayşe Hâtun’a izin vermeğin, mâ vaka‘a bi’t-taleb ketb olundu. Fi’l-yevmi’s-sâdis min Cumâdelâhire li sene isneteyn ve mi’e ve elf. Şuhûdü’l-hâl: Sinan Efendi b. Pîrî, Mehmed Efendi b. ( ) el-imâm, el-Hâc Mustafa b. Ali, Ahmed b. Abdullah, Mustafa b. Ali.