Bab Mahkemesi 54 Numaralı Sicil (H. 1102 / M. 1691) cilt: 20, sayfa: 172 Hüküm no: 180 Orijinal metin no: [29a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yakub b. İsa’nın menzilini Yusuf Bey b. Abdullah’a satması Mahmiye-i İstanbul’da Kefeli mahallesinde sâkin Yakub [b.] İsâ nâm kimesne meclis-i şer‘-i şerîf-i enverde, işbu bâ‘isü’l-kitâb Yusuf Bey b. Abdullah mahzarında ikrâr ve takrîr-i kelâm edip, arsası merhûme Emine Hâtun’un mahalle-i mezbûrede vâki‘ mescid-i şerîfinin ebniyesine meşrûta vakfı olup ebniyesi mülküm olan mahalle-i mezbûrede vâki‘ bir tarafdan Sâliha Hâtun mülkü ve bir tarafdan Hatice Hâtun tarafında olan vakıf menzil ve iki tarafdan tarîk-i âm ile mahdûd iki bâb fevkānî oda ve bir bâb tahtânî oda ve bi’r-i mâ ve kenîf ve zât-ı eşcâr-ı müsmireyi müştemil menzilin ebniye-i memlûkesin, mezbûr Yusuf bana tarafeynden îcâb ve kabûlü hâvî bey‘-i kat‘î ile seksen guruşa bey‘ ve teslîm ve arsasını dahi mütevellîsi olan el-Hâc Mehmed’in izin ve ma‘rifetiyle meccânen ferâğ ve tefvîz, ol dahi ber vech-i muharrer iştirâ ve tesellüm ve tefevvüz ve kabûl eylediğinden sonra semeni olan meblağ-ı mezbûr seksen guruşu mezbûr Yusuf Bey’den ahz u kabz eyledim. Ba‘de’l-yevm menzil-i mezbûrun ebniyesi mezkûr Yusuf Bey’in mülk-i müşterâsı ve arsası hakk-ı müfevvazı olmuşdur. Keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis min şehri Cumâdelâhire sene 1102. Şuhûdü’l-hâl: Ahmed Efendi b. Mehmed el-imâm, Mehmed Çelebi b. Musa el-kayyum, Mahmud Çelebi b. Hasan, el-Hâc Mehmed b. Hasan, Ali Çelebi b. Bâli, Mahmud b. Ali, Çavuş b. Abdullah.