Bab Mahkemesi 54 Numaralı Sicil (H. 1102 / M. 1691) cilt: 20, sayfa: 173 Hüküm no: 181 Orijinal metin no: [29a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Çelebi b. Halil’in alacak hususunda Osman Efendi b. İsmail ile sulh olması Mahmiye-i İstanbul’da Arabacı Bayezid mahallesinde sâkin İbrahim Çelebi b. Halil meclis-i şer‘-i şerîf-i enverde Osman Efendi b. İsmail mahzarında ikrâr ve takrîr-i kelâm edip, mezbûr Osman Efendi bundan akdem babam mezbûr Halil vefât etmekle terekesinden bi hasebi’l-irs bana isâbet[eden] eşyâsın ben füruht etmek murâd ettiğimde bi gayri hakkın on beş guruşumu ahz u kabz etmeğin, meblağ-ı mezbûru mezbûr Osman Efendi’den mukaddemâ taleb ve da‘vâ eylediğimde beynimizde münâza‘ât-ı kesîre ve muhâsamât-ı şedîde vukū‘undan sonra da‘vâ-yı mezkûrumdan mezbûr Osman Efendi an-inkâr benimle beş guruş üzerine sulh oldukda, ben dahi sulh-ı mezbûru kabûl ve bedel-i sulh olan meblağ-ı mezbûr beş guruşu mezbûr Osman Efendi yedinden bi’t-tamâm ve’l-kemâl ahz u kabz edip, ba‘de’l-yevm husûs-ı mezbûra ve ziyâde makbûzum olan on guruşa müte‘allika âmme-i da‘vâdan mezbûr Osman Efendi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî min Cumâdelâhire li sene isneteyn ve mi’e ve elf. Şuhûdü’l-hâl: Ahmed b. Mehmed, Derviş b. Mustafa, İbrahim Çelebi b. Mehmed, Mehmed Çelebi b. Hasan, Mehmed Çelebi b. İsmail, İbrahim Çelebi b. Ahmed.