Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 253 Hüküm no: 263 Orijinal metin no: [65a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb b. Mehmed’in Abdülvahhab b. Musa’dan alacağını tahsil etmesi Oldur ki, vilâyet-i Karaman muzâfâtından Aksaray nâm kasaba ahâlîsinden Receb b. Mehmed nâm kimesne meclis-i şer‘-i şerîfe hâzır olup kasaba-i mezbûr ahâlîsinden işbu râfi‘ü’l-kitâb Abdülvehhâb b. Musa nâm kimesne mahzarında takrîr-i kelâm edip bundan akdem mezbûr Abdülvehhâb benim bi gayrı tarîki şer‘î altı bin nakid akçe ve dört bin akçe kıymetli bir kakum ve bir tîrkeşim ve bir ferâcem ve bir sâde kılıç ve bir yağmurluğum alıp hâlâ da‘vâ eylediğimde inkâr edip mâbeynimizde nice nizâ‘ ve husûmet vâki‘ olmuş idi. Hâlâ muslihûn tavassut etmeğin ıskāt-ı da‘vâ için mezbûr Abdülvehhâb bana beş bin akçe teslîm edip ben dahi meblağ-ı merkūmu mezbûr Abdülvehhâb yedinden kabz ve tesellüm edip husûs-ı mezbûra müte‘allika cemî‘-i da‘âvâdan rızâmla ferâğ eyledim. Min ba‘d husûs-ı mezbûra müte‘allik da‘vâ edersem inde’l-hükkâm mesmû‘a olmaya dedikde, mukırr-ı mezbûrun ikrâr-ı meşrûhun mezkûr Abdülvehhâb vicâhen tasdîk edip mâ vaka‘a kayd olundu. Tahrîren fî 15 min Muharrem li sene 1003. Şuhûdü’l-hâl: Osman Çavuş el-mübâşir, Mevlânâ Alâaddin el-kadı, Abdülkādir [b.] el-Hâc Mustafa, Mehmed [b.] Mustafa, Yusuf b. Ali ve gayruhüm.