Bab Mahkemesi 54 Numaralı Sicil (H. 1102 / M. 1691) cilt: 20, sayfa: 173 Hüküm no: 182 Orijinal metin no: [29a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Efendi b. İbrahim’in mirası hususunda oğlu İbrahim’in kardeşi Ahmed Efendi ile sulh olması Mahmiye-i İstanbul’da Arabacı Bayezid mahallesinde sâkine iken bundan akdem vefât eden Halil Efendi b. İbrahim’in verâseti, zevcesi Emine bt. İbrahim ve sulbî kebîr oğulları Ahmed Efendi ve İbrahim’e münhasıra olduğu şer‘an zâhir ve müte‘ayyin oldukdan sonra mezbûr İbrahim meclis-i şer‘-i şerîfde, karındaşı Ahmed Efendi mahzarında ikrâr ve takrîr-i kelâm edip, babam müteveffâ-yı mezbûrun terekesinden bi hasebi’l-irsi’ş-şer‘î bana isâbet ve intikāl eden hissemi işbu yedimizde olan defter-i kassâm nâtık olduğu üzre karındaşım mezbûrun yedinden ahz u kabz edip, lâkin defter-i kassâmdan hâric tereke-i müteveffâ-yı mezbûrdan olmak üzre karındaşım mezbûr yüz yirmi guruşu benim haberim yoğiken ahz u kabz etmekle, meblağ-ı mezbûrdan bana isâbet eden hisse-i mu‘ayyenemi bundan akdem karındaşım mezbûrdan taleb ve da‘vâ ettiğimde, beynimizde münâza‘ât-ı kesîre vukū‘undan sonra da‘vâ-yı mezkûrumdan karındaşım mezbûr benimle on beş guruş üzerine sulh oldukda, ben dahi sulh-ı mezbûru kabûl ve bedel-i sulh olan meblağ-ı mezbûr on beş guruşu yedinden bi’t-tamâm ahz u kabz edip, ba‘de’l-yevm babam müteveffâ-yı mezbûrun hayâtında Osman nâm kimesneye verdiği seksen guruş ve kürekçi zimmî zimmetinde olan yüz guruş ki, cem‘an yüz seksen guruşdan mâ‘adâ müteveffâ-yı mezbûrun terekesine müte‘allika âmme-i da‘vâdan karındaşım mezbûr zimmetini ibrâ-i âmm-ı kātı‘ü’n-nizâ‘ ile ibrâ ve iskāt [29b] eyledim. Ba‘de’l-yevm gerek defter-i kassâmda tahrîr olan eşyâya ve gerek hâric-i defter hukūka müte‘allika bir vechile hak ve alâkam kalmayıp karındaşım mezbûrun tereke-i müteveffâ-yı mezbûra müte‘allika âmme-i da‘vâdan zimmeti berî olmuşdur dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî min Cumâdelâhire li sene isneteyn ve mi’e ve elf. Şuhûdü’l-hâl: Ahmed b. (…), Derviş Çelebi b. Mustafa, İbrahim Çelebi b. Mehmed, Mustafa b. Şaban, Osman Efendi b. İsmail ve gayruhüm.