Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 270 Hüküm no: 287 Orijinal metin no: [70a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Ayşe bt. Abdullah’ın menzilinin beytülmâl tarafından satın alınmadığı ve kapıcıbaşı Veli Ağa’nın satın aldığı Mahrûsa-i Galata’ya tâbi‘ kasaba-i Beşiktaş mahallâtından merhûm Yahya Efendi mahallesinde sâkine iken bundan akdem vefât edip cihet-i verâseti zevcine ve cânib-i beytülmâla munhasıra olup sülüs-i emvâlini cihet-i hayrâta vasiyyet eden merhûme Ayşe bt. Abdullah nâm hâtunun muhallefâtına vâzı‘u’l-yed olup hâlâ mahrûsa-i mezbûrede beytülmâl-ı hâs emîni olan kıdvetü’l-akrân el-Hâc Mehmed Çavuş b. Abdülmennân cânib-i beytülmâldan emâneten ve müteveffât-ı merkūmenin zevci ve vârisi olan Pervâne b. Abdullah asâleten ve sülüs-i merkūmu tenfîze vasiyy-i muhtârı olup vesâyeti nehc-i şer‘î üzre sâbite olan Mevlânâ Mehmed b. Mahmud el-kadı vesâyeten meclis-i şer‘-i râsihu’l-erkâna hâzırân olup işbu sâhib-i kitâb-ı sıhhat-nisâb hâlâ Dergâh-ı adâlet-penâhda kapıcıbaşı olan umdetü ashâbi’d-devle ve’l-ikbâl usvetü erbâbi’s-sa‘âde ve’l-iclâl mukarrebü’l-hazreti’s-sultâniye mu‘temedü’d-devleti’l-hâkāniyye Veli Ağa b. Memi Bey tarafından menzil-i âti’z-zikri iştirâ ve kabz ve def‘-i semene vekîl olup vekâlet-i mahkiyyesi hasm-ı câhid huzûrunda Mevlânâ Osman b. Abdülkerim el-müderris ve Ahmed b. Abdullah ve Hasan Çavuş b. Ali şehâdetleriyle sâbite olan kıdvetü’l-a‘yân Mehmed Çavuş b. ( ) mahzarında bi’t-tav‘ ve’r-rızâ ikrâr ve i‘tirâf edip müteveffât-ı merkūmenin muhallefâtından olup mahalle-i mezkûrede vâki‘ üç bâb beyt-i süflî ve iki sofa ve cüneyne ve zılle ve fevkinde üç bâb beyt-i ulvî ve sofa ve iki tarafı zılle ve dehliz ve iki kenîf ve biri tahtadan biri taşdan masnû‘ iki nerdübân ve iki mevzi‘de bi’r-i mâ ve bir fırın ve matbah ve mahzen ve hamam ve kenîf-i âhar ve kapu yanında bir beyt-i süflî fevkinde bir beyt-i ulvî ve sofa ve tahtında mahzen ve hadîka ve içinde iki mevzi‘de bi’r-i mâ ve matbah ve kasr ve beyt-i âhar-ı süflî ve bir birine muttasıl altı bâb süflî evler ve yine biri taşdan ve biri tahtadan masnû‘ iki nerdübân ve dokuz bâb buyût-ı ulviye ve iki kenîf ve biri tarîk-i âma ve biri cânib-i bahra meftûh iki muhavvata kapusın müştemil, etrâf-ı erba‘ası mefharü’l-ulemâi’l-kirâm Mevlânâ Abdullah Efendi b. Abdülkerim ve Mehmed b. Mahmud ve Ahmed b. Mahmud mülklerine ve deryâ ve tarîk-i âma muttasıl olan menzil bey‘ için kirâren ve mirâren mecâlis ve tâlibîn ve mehâfil-i râgıbîne arz edip, tamâm-ı rağbet-i nâs munkatı‘a oldukdan sonra müvekkil-i müşârun-ileyh Veli Ağa üzerinde beş kere yüz bin ve yirmi bin akçede karâr edip ziyâdeye tâlib ve râğıb olmamağın, menzil-i sâbiku’l-beyânı cemî‘-i tevâbi‘ ve levâhık ve kâffe-i merâsim ve merâfıkıyla vekîl-i mezkûr Mehmed Çavuş’a bey‘-i bâtt-ı sahîh-i şer‘î ile bey‘ edip, semen-i merkūm beş kere yüz bin ve yirmi bin akçeyi bi’t-tamâm vekîl-i mezbûr yedinden emâneten ve asâleten ve vesâyeten kabz ve tesellüm eyledik dediklerinde, vekîl-i mezbûr Mehmed Çavuş dahi menzil-i merkūmu vech-i meşrûh üzre müvekkil-i müşârun-ileyhe Veli Ağa için meblağ-ı merkūm ile iştirâ ve kabzını ikrâr ve i‘tirâf ve mukırrân-ı mezbûrânı ikrâr-ı meşrûhunda vicâhen ve şifâhen tasdîk ve tahkīk edip, mâ hüve’l-vâki‘ kayd olundu. Tahrîren fi’l-yevmi’l-âşir min Safer sene selâse ve elf. Şuhûdü’l-hâl: Mustafa Efendi el-müderris bi medreseti Sultan Süleyman, Abdurrahman Efendi b. Süleyman el-müderris bi İhdâ’s-semân, Mahmud Efendi el-müderris, Sinan Efendi b. Pîr Mehmed el-müderris, Pîr Ali Efendi el-müderris bi medreseti Beşiktaş, (…), Mustafa Ağa b. Ferhad Paşa reîsü’l-bevvâbîn, Mahmud Ağa reîsü’z-zevvâkīn, Mehmed Efendi ed-defterî, Mehmed Ağa b. Hasan el-müteferrika.