Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 273 Hüküm no: 291 Orijinal metin no: [71a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Abdülkâdir Efendi’nin yaptırttığı medresenin müderrislerine vakıftan günlük yirmi akçe verilmesi gerekirken ödemeyi yapmayıp mütevelliye tenbihatta bulunması Oldur ki, mahrûsa-i Galata hâricinde vâki‘ merhûm Seyyid Abdülkādir Efendi Medresesi’nde hâlâ müderris olan Mevlânâ Burhaneddin b. Hüseyin meclis-i şer‘-i şerîfe merhûm-ı mezkûrun işbu? evkāfına hâlâ mütevellî olan Rüstem b. Abdullah nâm kimesneyi ihzâr ve mahzarında takrîr-i kelâm edip, mezkûr Seyyid Abdülkādir Efendi hâl-i hayâtında medrese-i mezkûreyi medrese olmak üzre binâ edip vakfiye-i ma‘mûlün-bihâsında mastûr ve mukayyed olduğu üzre tertîb-i şurût ve ta‘yîn-i usûl ve zevâbıtını kendi nefsine şart edip medrese-i mezkûreye her kim müderris olursa evkāfından yevmî yirmi akçe vazîfe ta‘yîn edip ve hayâtta iken medrese-i mezkûreye müderris olanlara vazîfe-i merkūmeyi bi’t-tamâm edâ edip bu minvâl üzre musırran fevt olup vech-i meşrûh üzre medrese-i mezkûreye müderris olanların yevmî yirmi akçe vazîfe-i mu‘ayyenesi var iken hâlâ mütevellî olan merkūm Rüstem vazîfe-i mersûmeyi bana edâdan imtinâ‘ eder, suâl olunup zamânıma düşen vazîfe-i mu‘ayyenem alıverilmek taleb ederin dedikde, gıbbe’s-suâl mütevellî-i mezbûr inkâr edip istişhâd olundukda, udûl-i Müslimînden Mevlânâ İbrahim [b.] Receb el-kadı ve Mevlânâ Şaban Pîrî el-kadı ve Mevlânâ Mehmed b. Ömer el-mülâzım ve Mevlânâ Mustafa b. Durmuş el-mülâzım mahfil-i şer‘de bi’l-muvâcehe edâ-i şehâdet-i şer‘iyye edip fi’l-hakīka vâkıf-ı mezkûr Seyyid [Abdül]kādir Efendi hâl-i hayâtında medrese-i mezkûreyi medrese olmak üzre binâ eyledikden sonra vakfiye-i ma‘mûlün-bihâsında mastûr olduğu üzre tertîb-i şurût ve tebyîn-i zevâbıt [ve] kuyûdu kendi nefsine şart edip ve medrese-i mezkûreye her kim müderris olursa evkāfdan yevmî yirmi akçe vazîfe ta‘yîn edip ve hayâtda iken medrese-i mezkûreye müderris olanlara vazîfe-i mezkûreyi edâ edip bu minvâl üzre musırran fevt olup vech-i meşrûh üzre medrese-i mezkûreye müderris olanların vazîfe-i mu‘ayyeneleri yevmî yirmi akçedir. Biz bu husûsa şâhidleriz şehâdet dahi ederiz dediklerinde, mezbûrûnun şehâdetleri ba‘de’t-ta‘dîl hayyiz-i kabûlde vâkı‘a olmağın, cânib-i şer‘-i mutahhardan mütevellî-i mezbûra müderris-i mersûmun zamânına düşen vazîfe-i mu‘ayyenesin mahsûl-i vakfdan edâya tenbîh olunup mâ vaka‘a kayd olundu. Fî evâsıtı Muharremi’l-harâm sene selâse ve elf. Şuhûdü’l-hâl: Mevlânâ Bostan b. Ömer el-müderris, Mevlânâ Ramazan [b.] Bayezid el-müderris, Ahmed b. Hüseyin, Hasan b. Abdullah ve gayruhüm.