Bab Mahkemesi 54 Numaralı Sicil (H. 1102 / M. 1691) cilt: 20, sayfa: 175 Hüküm no: 184 Orijinal metin no: [29b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yamandi v. Kostantin ile kiracısı Katano v. Yani’nin birbirlerinin zimmetini ibra etmesi Mahmiye-i İstanbul’da vâki‘ Kaliçeciler hânında olan tüccâr tâifesinden Katano v. Yani nâm zimmî meclis-i şer‘-i şerîf-i enver ve mahfil-i dîn-i münîf-i ezherde, yine tâife-i mezbûrdan işbu râfi‘ü hâze’s-sifr Yamandi v. Kostantin nâm zimmî muvâcehesinde takrîr-i kelâm ve ta‘bîr ani’l-merâm edip, zikr olunan Kaliçeciler hânında merkūm Yamandi’nin taht-ı tasarrufunda olan odasında ben ücret-i ma‘lûme ile müste’cir iken hâlâ merkūm Yamandi fesh-i akd-i icâre edip, oda-i mezkûreden beni ihrâc murâd ettiğinde, ben dahi oda-i mezkûreye ve beynimizde cârî olan ba‘zı ahz u i‘tâya müte‘allika husûs-ı ma‘lûm için nizâ‘ etmişdim. El-hâletü hâzihî târih-i kitâbdan on güne değin ben oda-i mezbûrdan çıkıp metâ‘ımı âhar yere nakl etmek ta‘ahhüd ettiğimden sonra merkūm Yamandi ile oda-i mezkûreye ve târih-i kitâba gelince beynimizde cereyân eden ahz u i‘tâya müte‘allika kalîl ü kesîr hukūk da‘vâsından her birimiz âharın zimmetini ibrâ ve iskāt eyledik dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fî şehri Cumâdelâhire li sene [1102]. Şuhûdü’l-hâl: Mustafa Çavuş b. Abdullah el-mübâşir, İbrahim Çelebi b. Ahmed, İbrahim Çelebi b. Mehmed.