Bab Mahkemesi 54 Numaralı Sicil (H. 1102 / M. 1691) cilt: 20, sayfa: 176 Hüküm no: 185 Orijinal metin no: [30a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçeri Bayram Odabaşı b. Mehmed’in emânet eşya davasının reddi Dergâh-ı Âlî yeniçerilerinin yedinci cemâ‘atine mahsûs oda yoldaşlarından Bayram Odabaşı b. Mehmed meclis-i şer‘-i lâzımü’t-tevkīrde, oda-i mezbûrda hâlâ odabaşı olan el-Hâc Ahmed b. Bektaş mahzarında üzerine da‘vâ ve takrîr-i kelâm edip, târih-i kitâbdan altı sene mukaddem Şâm-ı şerîf’e gider olduğumda mezbûr el-Hâc Ahmed Odabaşı’ya bir husûs için bi tarîki’r-rüşvet kırk iki yaldız altınımı ahz u kabz etmekle, meblağ-ı mezbûru da‘vâ ve taleb eylediğimde bana edâdan imtinâ‘ eder, suâl olunup alıverilmesi matlûbumdur dedikde, gıbbe’s-suâl ve akībe’l-inkâr, müdde‘î-i mezbûr odabaşıdan müdde‘âsına mutâbık beyyine taleb olundukda ityân-ı beyyineden izhâr-ı acz edip istihlâf etmekle, fi’l-hakīka târih-i mezbûrda husûs-ı mezkûr için mezbûr Bayram’dan bi tarîki’r-rüşvet ol mikdâr altın almadığına ve mezbûr Bayram Odabaşı’nın ol vechile zimmetinde red ve zamânı lâzım hakkı olmadığına merkūm Ahmed’e yemîn teklîf olunup, ol dahi hasbe’l-mes’ûl yemîn bi’llahi’l-aliyyi’l-a‘lâ etmeğin, mûcebiyle müdde‘î-i merkūm Bayram Odabaşı bî-vech mu‘ârazadan men‘ olunup, mâ vaka‘a bi’t-taleb ketb olundu. Fi’l-yevmi’r-râbi‘ min Cumâdelâhire sene 1102. Şuhûdü’l-hâl: Hasan Beşe el-mübâşir, İbrahim Çelebi b. Ahmed, İbrahim Çelebi b. Ahmed, Mehmed b. Ahmed, Ali b. Yusuf.