Bab Mahkemesi 54 Numaralı Sicil (H. 1102 / M. 1691) cilt: 20, sayfa: 177 Hüküm no: 186 Orijinal metin no: [30a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Hüseyin’in emânet eşyaları için Hacı Ahmed b. İbrahim’le sulh olması Medîne-i Ebâ Eyyûb-i Ensârî’de Yeniçeşme kurbunda sâkine olup, zâtı Hasan b. Abdurrahman ve Mehmed Beşe b. Ahmed nâm kimesneler ta‘rîfleriyle mu‘arrefe olan Fâtıma bt. Hüseyin nâm hâtun meclis-i şer‘-i şerîf-i enverde, bâ‘isü hâze’l-kitâb el-Hâc Ahmed b. İbrahim mahzarında ikrâr ve takrîr-i kelâm edip, bundan akdem mezbûr el-Hâc Ahmed’e otuz iki dal kıymetleri beynimizde ma‘lûm inci ve bir sîm ayna ve bir dîvân kaliçesi ve bir yan keçesi ve bir çift baş yasdığımı emânet vaz‘ ve teslîm edip, ba‘dehû taleb ve da‘vâ ettiğimde ol dahi inkâr etmeğin, beynimizde nizâ‘-ı küllî vukū‘undan sonra muslihûn tavassut edip, da‘vâ-yı mezkûremden beynimizde sekiz yüz akçe üzerine akd-i musâlaha olundukda, ben dahi sulh-ı mezbûru kabûl ve bedel-i sulh olan meblağ-ı mezkûra müte‘allika cemî‘-i da‘vâdan mezbûr el-Hâc Ahmed’in zimmetini ibrâ ve iskāt eyledim. Ba‘de’l-yevm kat‘â da‘vâ ve nizâ‘ım kalmadı dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Cumâdelâhire sene 1102. Şuhûdü’l-hâl: Hasan Çelebi b. Abd[ullah], Mehmed Beşe b. Ahmed, Mehmed Çavuş b. Ahmed, Davud Çelebi, Hüseyin Beşe, Halil b. Mehmed.