Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 288 Hüküm no: 309 Orijinal metin no: [75a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bâli b. Şaban’ın, muhallefâtına el konulan Behrâm b. Abdullah’ın mirasçısı olduğu Udûlden el-Hâc Veli b. İbrahim ve Nazar b. Mehmed nâm kimesneler meclis-i şer‘-i şerîfde hâzırân olup, mahrûse-i Galata’da vâki‘ Beytülmâl-i hâssın emîni olup mahrûse-i mezbûre tevâbi‘inden Kasımpaşa kasabası mahallâtından Surûrî mahallesinde sâkin iken bundan akdem fevt olan merhûm Behrâm b. Abdullah nâm âzatlı kölenin muhallefâtına vâzı‘-ı yed olan fahrü’l-akrân Mehmed Çavuş b. Abdülmennân mahzarında, mahalle-i merkūmede sâkin olan Bâli b. Şaban nâm kimesneden sâdır olan da‘vâ-i sahîha-i şer‘iyyede gıbbe’l-istişhâdi’ş-şer‘î şöyle şehâdet ettiler ki, müdde‘î-i mezkûr Bâli, müteveffâ-i mezkûr Behrâm’ın usûbe-i nesebiyye cihetiyle vârisidir. Zira müdde‘î-i mezkûr Bâli, müteveffâ-i merkūm Behrâm’ı âzat eden efendisi merhûm Ramazan b. Şaban’ın ana-baba bir kardeşi ve tarîk-ı inhisâr cihetiyle vârisidir. Müteveffâ-i mesfûr Behrâm’ın verâseti müdde‘î-i mesfûra münhasırdır. Ondan başka vâris ve terekesine müstehak kimesne ma‘lûmumuz değildir. Şehâdetleri ba‘de ri‘âyeti şerâiti’l-kabûl inde’ş-şer‘ makbûl, mûteber ve mer‘î olmağın mûcibince hükmedildi. Cerâ zâlike ve hurrire fî evâsıtı Rebî‘ilevvel sene selâse ve elf. Derkenâr: Sübût-i verâset-i usûbet-i nesebiyye. Şuhûdü’l-hâl: Ali Çavuş el-mübâşir, Ali Reis b. Abdullah, Mehmed b. Sinan, Süleyman b. Pîrî, Hızır b. Gülâbî, Nebi b. Hasan